தமிழகம், புதுச்சேரியில் வடகிழக்கு பருவமழை நாளை வலுவடையும்: வானிலை மையம்!

தமிழகம் மற்றும் புதுச்சேரியில் வடகிழக்கு பருவமழை நாளை வலுவடைய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.

இதுதொடர்பாக சென்னை வானிலை ஆய்வு மைய இயக்குநர் எஸ்.பாலசந்திரன், நேற்று செய்தியாளர்களிடம் கூறியதாவது:

தெற்கு வங்கக் கடலின் மத்திய பகுதிகளில், 6-ம் தேதியை ஒட்டி குறைந்த காற்றழுத்த தாழ்வுப் பகுதி உருவாகக்கூடும். இது மேற்கு மற்றும் வடமேற்கு திசையில் இலங்கை மற்றும் குமரிக்கடல் பகுதிகளில் 6 முதல் 8-ம் தேதி வரை கடக்கக்கூடும். அதன் காரணமாக இந்நாட்களில் வடகிழக்கு பருவமழை வலுப்பெறும்.

எனவே ஆழ்கடலில் மீன் பிடிப்புக்குச் சென்றுள்ள மீனவர்கள், 6-ம் தேதிக்குள் கரைக்கு திரும்ப வேண்டும் என்று வானிலை ஆய்வு மைய இயக்குநர் பாலச்சந்திரன் கூறினார்.

இதனிடையே, வடகிழக்கு பருவமழை துவங்கி உள்ளதாலும், தெற்கு அந்தமான் கடல் பகுதி மற்றும் தெற்கு வங்கக்கடலில் உருவாகி உள்ள காற்றழுத்த தாழ்வு பகுதியாலும், நவம்பர் 7 மற்றும் 8-ம் தேதிகளில் தமிழகம், புதுச்சேரி, கேரளாவில் கனமழை பெய்ய வாய்ப்புள்ளதாக இந்திய வானிலை மையம் அறிவித்துள்ளது குறிப்பிடத்தக்கது.