எங்களுக்கு மதிப்பில்லை ஓபிஎஸ் ஆதரவாளர்கள் ஆவேசம்: சமாதானம் செய்துவைத்த அமைச்சர்

திருவள்ளூர் அருகே நடைபெற்ற அதிமுக செயல்வீரர்கள் கூட்டத்தில், ஓபிஸ் ஆதரவாளர்களுக்கும் ஈபிஎஸ் ஆதரவாளர்களுக்கும் வாக்குவாதம் ஏற்பட்டுள்ளது.

திருவள்ளூர் மாவட்டம் தண்டலம் கிராமத்தில் நடைபெற்ற அதிமுக செயல்வீரர்கள் கூட்டத்தில், ஈபிஎஸ்-ஓபிஎஸ் ஆதரவாளர்கள் கடும் வாக்குவாதத்தில் ஈடுபட்டனர். இந்த கூட்டமானது அமைச்சர்கள் மாஃப பாண்டியராஜன், பெஞ்சமின் ஆகியோர் முன்னிலையில் நடைபெற்றது. இந்த கூட்டத்தில் ஓபிஎஸ் ஆதரவாளர்கள் சிலர் , ஈபிஎஸ் ஆதரவாளர்கள் தங்களுக்கு மதிப்பு கொடுக்கவில்லை என்று குற்றம்சாட்டினர்.

மேலும் அரசு ஒப்பந்தங்கள் தங்கள் தரப்பினருக்கு வழங்கப்படுவதில்லை என்று கூறி வாக்குவாதத்தில் ஈடுபட்டனர். ஈபிஎஸ் ஆதரவாளர் கும்மிடிப்பூண்டி எம்எல்ஏ விஜயகுமார் , ஓபிஎஸ் ஆதரவாளர் முன்னாள் மாவட்ட ஊராட்சி குழு தலைவர் ரவிச்சந்திரன் ஆகியோர் கடும் வாக்குவாதத்தில் ஈடுபட்டனர். இதனால் கூட்டத்தில் பரபரப்பு ஏற்பட்டது. அதன் பின்னர் அமைச்சர் மாஃபா பாண்டியராஜன் அனைவரையும் சமாதானம் செய்து வைத்தார்.