கட்டிக்கோ..ஒட்டிக்கோ மோடி: வேட்டி சட்டையில் கலகல!

மோடி தமிழ்நாடு வருகிறார் என்றால் தமிழர்கள் உற்சாகமாகிவிடுகிறார்கள். சிலர் அவரை வரவேற்கத் துடித்தால் பெருங் கூட்டம் கோ பேக் மோடி (#gobackmodi) என டிவிட்டரில் டிரெண்டாக்கி திருவிழா கொண்டாடிவிடுவார்கள். சீன அதிபருடனான இரண்டாவது முறைசாரா மாநாட்டில் கலந்துகொள்ள வந்திருந்தாலும் கோ பேக் மோடி டிரெண்டாகிவருகிறது.

தமிழர்களின் மனதை எப்படியும் கவர்ந்துவிடவேண்டும் என்று துடிப்புடன் செயல்பட்டுவருகிறார் மோடி. அதனால்தான் சென்னை வந்தாலும் அமெரிக்கா சென்றாலும் தமிழில் பேசி அசத்திவருகிறார். இந்நிலையில் இன்று மாமல்லபுரத்தில் சீன அதிபர் ஷி ஜின்பிங்கை சந்தித்து உரையாடிவருகிறார். அப்போது தமிழரின் பாரம்பரிய உடையான வேட்டி, சட்டையில் வலம் வருகிறார். அர்ஜுனன் தபசு உள்ளிட்ட மாமல்லபுரத்தின் சிற்பத் தொகுதிகளை சீன அதிபருக்கு விவரித்து வருகிறார்.

மோடியின் வேட்டி அணிந்த புகைப்படத்தால் ஏற்படப்போகும் விளைவுகள்-வீடியோவை காண


மோடியின் இந்தப் புகைப்படத்தை பாஜகவைச் சேர்ந்தவர்கள் அதிகமாக பகிர்ந்துவருகின்றனர். ஏற்கெனவே தமிழில் பேசிய மோடியை தமிழர்கள் கொண்டாடவில்லை என்று குறைபட்டுக்கொண்ட முன்னாள் அமைச்சர் பொன்.ராதாகிருஷ்ணன் தமிழர்களை நன்றி மறந்தவர்கள் என்றார். அப்போது அந்த வார்த்தை பெரும் விமர்சனங்களைச் சந்தித்தது. இந்நிலையில் தமிழர் உடையில் மோடி வலம் வருவதை பாஜகவினர் கொண்டாடுவதில் ஆச்சரியமில்லை.
அதே சமயம் மோடி தமிழர் உடையில் வலம் வருகிறாரே என்று கோ பேக் மோடி ஹேஸ் டேக் போடுகிறவர்களைக் கேட்டால், மோடி ஒவ்வொரு மாநிலத்துக்கும் செல்லும் போது அந்த மாநில மக்களின் உடைகள் அணிந்து வருவதை தொடர்ச்சியாக செய்துவருகிறார். அந்த முறையிலேயே தமிழ்நாட்டில் வேட்டி சட்டையுடன் வலம் வருகிறார். அதனால் இதை பெரிய விஷயமாக எடுத்துக்கொள்ளத் தேவையில்லை என்கின்றனர்.