கொரோனா: இங்கிலாந்து பிரதமர் முதல் தமிழக அமைச்சர் வரை...

இங்கிலாந்து பிரதமரான போரிஸ் ஜான்சன் கடந்த ஏப்ரல் மாதம் முதல் வாரத்தில் கொரோனா நோய்த்தொற்றுக்கு ஆளானார். இதையடுத்து லண்டனில் உள்ள செயின்ட் தாமஸ் மருத்துவமனையில் அவர் அனுமதிக்கப்பட்டார். அங்கு சில நாட்கள் அவருக்கு தீவிர சிகிச்சை அளிக்கப்பட்ட பிறகு, மறுபிறவி எடுத்ததைப் போல், கொரோனாவில் இருந்து குணமடைந்து ஜான்சன் வீடு திரும்பினார்.

இங்கிலாந்து பிரதமர் போரிஸ் ஜான்சனை தொடர்ந்து, ரஷிய பிரதமர் மிக்கல் மிஸ்சுஸ்டின், ஏப்ரல் மாத இறுதியில் கொரோனா தொற்றுக்கு ஆளானார். இருப்பினும், மருத்துவமனையில் அனுமதிக்கும் அளவுக்கு அவரது உடல்நிலை மோசமடையவில்லை. ஓரிரு வாரங்கள் அவர் வீட்டில் தன்னைத்தானே தனிமைப்படுத்திக் கொண்டு கொரோனாவில் இருந்து விடுபட்டார்.

டெல்லி மாநில அரசின் சுகாதாரத் துறை அமைச்சரான சத்யேந்தர் ஜெயினுக்கு நேற்று முன்தினம் (ஜூன் 17) கொரோனா தொற்று உறுதி செய்யப்பட்டது. இதையடுத்து பிளாஸ்மாதெரபி சிகிச்சைக்காக, மேக்ஸ் மருத்துவமனையில் அனுமதிக்கப்பட்டுள்ள அவருக்கு தீவிர சிகிச்சை அளிக்கப்பட்டு வருகிறது. அவரின் உடல்நிலை கவலைக்கிடமாக உள்ளதாக மருத்துவமனை நிர்வாகம் தெரிவித்துள்ளது.

சென்னை திருவல்லிக்கேணி -சேப்பாக்கம் தொகுதி எம்எல்ஏவான ஜெ. அன்பழகன் அண்மையில் கொரோனா நோய்த்தொற்று ஆளானார். சிகிச்சைக்காக, குரோம்பேட்டையில் உள்ள பிரபல தனியார் மருத்துவமனையில் அனுமதிக்கப்பட்டிருந்த அவர் சிகிச்சைப் பலனின்றி, ஜூன் 10 ஆம் தேதி உயிரிழந்தார். இந்தியாவில் கொரோனாவுக்கு பலியான முதல் எம்எல்ஏ இவர் என்பது குறிப்பிடத்தக்கது.

தமிழக உயர்க் கல்வித் துறை அமைச்சராக உள்ள கே.பி. அன்பழகனுக்கு கொரோனா தொற்று கண்டறியப்பட்டுள்ளதாக, சென்னை மணப்பாக்கத்தில் உள்ள பிரபல தனியார் மருத்துவமனை தெரிவித்துள்ளது. இதையடுத்து, அந்த மருத்துவமனையிலேயே அவருக்கு சிகிச்சை அளிக்கப்பட்டு வருகிறது.