தனியார் பள்ளி கல்வி கட்டணத்தில் மாற்றம்; சட்ட திருத்த மசோதா இன்று தாக்கல்...!

சென்னை: தனியார் பள்ளி கல்வி கட்டணத்தில் மாற்றம் செய்யும், சட்ட திருத்த மசோதா இன்று தாக்கல் செய்யப்படுகிறது.

தனியார் பள்ளிகளில் அதிகப்படியான கட்டணம் வசூலிக்கப்படுவதாக தொடர்ந்து குற்றச்சாட்டுக்கள் எழுந்த வண்ணம் உள்ளன. இதையடுத்து தனியார் பள்ளி கட்டணத்தை வரைமுறைப்படுத்த, அரசு நடவடிக்கை மேற்கொண்டது.

கடந்த 2009ஆம் ஆண்டு, ஓய்வு பெற்ற நீதியரசர் கோவிந்தராஜன் தலைமையில் கட்டண நிர்ணய குழு அமைக்கப்பட்டது. இந்த குழுவின் வழிகாட்டுதலின்படி, புதிய சட்டம் இயற்றப்பட்டது. இதையடுத்து 2013 முதல் 2016 வரை, சிங்காரவேலன் தலைமையில் கட்டண நிர்ணய குழு செயல்பட்டது. நடப்பாண்டில் மாசிலாமணி தலைமையில் கட்டண நிர்ணய குழு செயல்பட்டு வருகிறது.

இந்நிலையில் கடந்த 2009ஆம் ஆண்டு கொண்டு வரப்பட்ட தனியார் கட்டண நிர்ணய சட்டத்தில் மாற்றம் செய்ய தமிழக அரசு திட்டமிட்டுள்ளது. இதற்கான சட்ட திருத்த மசோதா, இன்று கூடும் சட்டப்பேரவையில் பள்ளிக் கல்வித்துறை அமைச்சர் செங்கோட்டையன் தாக்கல் செய்கிறார்.

Private School fees structure will be modified says TN.