டாஸ்மாக் கடைக்கு எதிராக போராட்டம்: போலீசார் தடியடி

கோவை: டாஸ்மாக் கடைக்கு எதிராக போராட்டம் நடத்திய பொதுமக்கள் மீது போலீசார் கண்மூடித்தனமாக நடத்திய தடியடியில் ஒருவரது மண்டை உடைக்கப்பட்டுள்ளது.

நெடுஞ்சாலைகளில் உள்ள மதுக்கடைகளால் அதிக அளவிலான விபத்துகள் நடக்கின்றன என அங்கிருக்கும் டாஸ்மாக் உள்ளிட்ட மதுக் கடைகளை அகற்றுவதற்கு உச்ச நீதிமன்றம் உத்தரவிட்டது. இதனால் நெடுஞ்சாலைகளில் இருந்த சுமார் 3000-க்கும் மேற்பட்ட கடைகள் மூடப்பட்டன. இதனால், அரசுக்கு பல ஆயிரம் கோடி ரூபாய் வருமான இழப்பு ஏற்பட்டுள்ளதாக கூறப்படுகிறது.

இதனிடையே, மாற்று இடங்களில் டாஸ்மாக் கடைகளை திறக்க தமிழக அரசு சார்பில் நடவடிக்கைகள் முடுக்கி விடப்பட்டுள்ளன. நெடுஞ்சாலைகளுக்கு அருகே கடைகள் இருக்கக் கூடாது என்பதால், மாற்று இடங்களில் அமைக்கப்படும் டாஸ்மாக் கடைகளில் பெரும்பாலானவை ஊருக்குள் அமைக்கப்பட்டு வருகின்றன. ஆனால், இதற்கு பொதுமக்கள் கடும் எதிர்ப்பு தெரிவித்து வருகின்றனர்.

இந்நிலையில், கோவை சாமளாபுரத்தில் ஊருக்குள் அமைக்கப்படவிருந்த டாஸ்மாக் கடையை மூடக் கோரி, அப்பகுதி எம்எல்ஏ கனகராஜ் மற்றும் ஏராளமான பெண்கள் உள்பட பொதுமக்கள் போராட்டத்தில் ஈடுபட்டனர்.

இன்று காலை முதல் நடைபெற்று வந்த பொதுமக்களின் போராட்டத்தைத் தொடர்ந்து, அங்கு வந்த அதிகாரிகள் பொது மக்களுடன் பேச்சுவார்த்தை நடத்தினர். அப்போது, கடை மூடப்படும் என அதிகாரிகள் உறுதியளித்ததாக தெரிகிறது. ஆனாலும், அங்கிருந்த கலைந்து செல்லாமல் பொதுமக்கள் தொடர் போராட்டத்தில் ஈடுபட்டதாக கூறப்படுகிறது.

அதனைத்தொடர்ந்து, டாஸ்மாக் கடைக்கு எதிராக போராட்டம் நடத்திய பொதுமக்கள் மீது போலீசார் கண்மூடித்தனமாக தாக்குதல் நடத்தினர். பெண்கள் என்றும் பாராமல் போலீசார் நடத்திய இந்த கொடூர தாக்குதலில், ஒருவரது மண்டை உடைந்து ரத்தம் ஆறாக பெருக்கெடுத்து ஓடியது. அதில், படுகாயமடைந்த அவர் மருத்துவமனையில் சிகிச்சைக்காக அனுமதிக்கப்பட்டுள்ளார்.

போலீசாரின் கண்மூடித்தனமான கொடூரத் தாக்குதலால் அப்பகுதியில் பரபரப்பு ஏற்பட்டுள்ளது என்பது குறிப்பிடத்தக்கது.
Public protest against Tasmac: police lathi charge