Rajinikanth: ரஜினியின் டுவீட்டை அரசியலாக்கும் கமல்: நல்லவர் துணை நின்றால் 40 எளிது!

நாடாளுமன்றத் தேர்தலில் முதல் முறையாக போட்டியிடப்போகும் கமல் ஹாசனுக்கு ரஜினிகாந்த் டுவிட்டரில் வாழ்த்து தெரிவித்துள்ளார்.

மக்களவைத் தோ்தல் விரைவில் நடைபெறவுள்ள நிலையில் பல்வேறு கட்சிகளும் கூட்டணி பேச்சுவார்த்தையில் தீவிரம் காட்டி வருகின்றன. திமுக - காங்கிரஸ் கூட்டணி, அதிமுக – பாஜக- பாமக கூட்டணி உறுதி செய்யப்பட்டுள்ள நிலையில், தேமுதிக உடன் கூட்டணி குறித்து முன்னணி கட்சிகள் தீவிரம் காட்டி வருகின்றனர். இந்த நிலையில், வரும் தேர்தலில் கமல் ஹாசனின் மக்கள் நீதி மய்யம் கட்சி 40 தொகுதியிலும் போட்டியிடும் என்று தெரிவிக்கப்பட்டது. அதோடு, 39 தொகுதிகளில் போட்டியிடும் வேட்பாளர்கள் குறித்து தேர்வு நடைபெறுகிறது என்றும், கமல் ஹாசன் ஒரேயொரு தொகுதியில் போட்டியிடுவார் என்றும் ஏற்கனவே கூறப்பட்டிருந்தது. இந்த நிலையில் தான் மக்கள் நீதி மய்யம் கட்சியின் 2ஆவது ஆண்டு தொடக்கவிழா நெல்லையில் நேற்று நடந்தது.

இதன் காரணமாக ரஜினிகாந்த், கமல் ஹாசனுக்கு டுவிட்டரில் வாழ்த்து தெரிவித்திருந்தார். அதில் அவர் கூறுகையில் கட்சி ஆரம்பித்து, இரண்டாம் ஆண்டில் அடி எடுத்து வைத்து, தேர்தலில் முதல்முறையாக போட்டி இடப்போகும் மக்கள் நீதி மய்யத் தலைவர்...என் நண்பர் கமல்ஹாசன், பொது வாழ்விலும் வெற்றி பெற என் மனமார்ந்த நல்வாழ்த்துக்கள்... என தெரிவித்துள்ளார்.

இதற்கு பதிலளிக்கும் வகையிலும், ரஜினியின் ஆதரவை பெறும் வகையில், கமல் ஹாசன் நன்றி தெரிவித்திருந்தார். இது தொடர்பாக கமல் ஹாசன் டுவிட்டரில் கூறியிருப்பதாவது: அதில் அவர் கூறுகையில் நன்றி @rajinikanth, என் 40 ஆண்டு கால நண்பரே. நல்லவர் துணை நின்றால் நாற்பது எளிதே , நாளை நமதே என தெரிவித்துள்ளார்.

இதற்கு முன்னதாக, தான் எந்தக் கட்சிக்கும் ஆதரவு இல்லை என்றும், தனது ரஜினி மக்கள் மன்றம் ரஜினி ரசிகர் மன்றம் ஆகியவற்றின் பெயரில் என்னுடைய பெயரோ, மன்றத்தின் கொடியோ, எந்த கட்சிக்கும் ஆதரவாகவோ அல்லது பிரச்சாரம் செய்வதற்கோ பயன்படுத்தக் கூடாது என்று தெரிவித்திருந்தார்.

அப்படியிருந்தும், கமல் ஹாசன், ரஜினியின் ஆதரவு தனக்கு இருப்பதாக நம்புகிறேன் என்று செய்தியாளர்கள் சந்திப்பில் கூறியிருந்தார். இந்த சமயத்தில் ரஜினிகாந்த், கமல் ஹாசனுக்கு வாழ்த்து தெரிவித்து டுவிட்டரில் பதிவிட்டது ரஜினியின் ஆதரவு கமலுக்கு இருப்பதாக அரசியல் வட்டாரத்தில் கிசுகிசுக்கப்படுகிறது.