தமிழகம் வந்தது ராம ராஜ்ய ரத யாத்திரை!!

அயோத்தியில் ராமர் கோவில் கட்ட வேண்டும் என்பதை வலியிறுத்தி நடத்தப்படும் ராம ராஜ்ய ரத யாத்திரை, இன்று காலை நெல்லை வழியாக தமிழகத்திற்கு வந்தது.

அயோத்தியில் ராமர் கோவில் கட்ட வேண்டும் என்ற கோரிக்கையை வலியுறுத்தி, விஸ்வ இந்து பரிஷாத் அமைப்பின் சார்பாக, கடந்த மாதம் 13 ஆம் தேதி ராம ராஜ்ய ரத யாத்திரை உத்தரப்பிரதேச மாநிலம் அயோத்தியில் தொடங்கியது. இதனை அம்மாநில முதல்வர் யோகி ஆதித்யநாத் தொடங்கி வைத்தார்.
இந்தியாவின் பல்வேறு மாநிலங்களில் சுற்றுப்பயணம் மேற்கொண்ட ராம ராஜ்ய ரத யாத்திரை, இன்று நெல்லை மாவட்டம் செங்கோட்டை வழியாக தமிழகத்திற்கு வந்தது. இதற்கு ஸ்டாலின், வைகோ, சீமான், வேல்முருகன், திருமுருகன் காந்தி உள்ளிட்ட பல்வேறு தமிழக கட்சிகளும் எதிர்ப்பு தெரிவித்தன. திமுக கட்சியின் செயல் தலைவர் மு.க.ஸ்டாலின் இதுபற்றி கூறுகையில், “தமிழக அரசு ராம ராஜ்ய ரத யாத்திரை தமிழகத்திற்குள் நுழைவதை தடை விதிக்க வேண்டும்” என்று கூறினார்.
இந்நிலையில், இன்று காலை நெல்லை மாவட்டம் செங்கோட்டை வழியாக ராம ராஜ்ய ரத யாத்திரை தமிழகத்திற்குள் வந்தது. இதற்கு எதிர்ப்பு தெரிவித்து பல்வேறு கட்சியினரும் போராட்டம் நடத்தி வருகின்றனர்.

முன்னதாக, ராம ராஜ்ய ரத யாத்திரை வருவதையொட்டி, நெல்லை மாவட்டத்தில் மார்ச் 19 ஆம் தேதி முதல் 23 ஆம் தேதி வரை 144 தடை உத்தரவு பிறப்பித்து மாவட்ட ஆட்சியர் சந்தீப் நந்தூரி உத்தரவிட்டிருந்தார் என்பது குறிப்பிடத்தக்கது .