தண்ணீர் பிரச்சனையால் கட்டணங்களை உயர்த்தும் மருத்துவமனைகள்!

சென்னை மற்றும் சுற்றுவட்டாரப் பகுதிகளில் நிலத்தடி நீர் முற்றிலும் வறண்டு விட்டன. மேலும் பருவமழையும் பொய்துவிட்டதால், சென்னையின் குடிநீர் தேவைகளை பூர்த்தி செய்துவரும் பிரதான ஏரிகளான பூண்டி, சோழவரம், செம்ரம்பாக்கம், புழல் ஆகிய ஏரிகளும் நீரின்றி வரண்டுவிட்டன.

தண்ணீர் பிரச்சனை தலைவிரித்தாடும் நிலையில், இதன் காரணமாக சென்னையில் உள்ள மருத்துவமனைகளில் மருத்துவர்களின் கட்டணமும், உள்நோயாளிகளின் அறை வாடகை, டயாலிசிஸ் சிகிச்சை முறைகள் போன்றவற்றின் விலைகளை மருத்துவமனை நிர்வாகம் உயர்த்தியுள்ளது.

கடந்த மே மாதத்தின் மத்தியில் சென்னையில் சில மருத்துவமனைகளின் உள்நோயாளிகளின் அறை வாடகை ரூ.350 வரை உயர்த்தப்பட்டுள்ளதாக கூறப்படுகிறது. பெரும்பாலான கார்ப்பரேட் மருத்துவமனைகள் தண்ணீர் தட்டுப்பாட்பால் ஏற்பட்டுள்ள செலவினங்களை சமாளிகவே இந்த வாடகை உயர்வு என தெரிவித்துள்ளது.

30 படுக்கைக்கொண்ட மருத்துவமனைக்கு, ஒரு நாளைக்கு ரூ.12,000 முதல் ரூ.15,000 வரை தண்ணீருக்காக செலவிடப்படுவதாக கூறியுள்ளன. இந்த கட்டணச்சுமை நோயாளிகள் மீது விதிக்கப்படுவதாக இந்திய மருத்துவ சங்கத்தின் முன்னாள் தலைவர் டாக்டர். டி. என் ரவிசங்கர் குறிப்பிட்டுள்ளார்.

மேலும் தனியார் வாட்டர் நிறுவனங்களும் மருத்துவமனைக்கு விணியோகிக்கும் தண்ணீருக்கான விலையை இரு மடங்கு உயர்த்தியுள்ளன . சென்னை தரமணியில், 200 படுக்கை வசதிக்கொண்ட சுகாதார சேவை மையம், ஆழ்துளை கிணற்று நீரை பயன்படுத்தியும் மாதத்திற்கு தண்ணீருக்காக மட்டும் மாதம் ரூ. 2 லட்சம் செலவிட்டுவருவதாக மருத்துவ சேமை மைய இயக்குனர் சுரேஷ் தெரிவித்துள்ளார்.

தற்போது ஆழ்துளை கிணறுகள் முற்றிலும் வரண்டுவிட்ட நிலையில் டேங்கர் லாரிகளில் இருந்து தண்ணீர் வாங்குவதாகும், நிலவி வரும் தண்ணீர் பிரச்சினையால் லாரி ஓட்டுனர்களும் 1200 ரூபாயில் இருந்து 2000 ரூபாய் வரை விலை உயர்த்திவிட்டதாக கூறியுள்ளார்.

வெளியில் இருந்து வாங்கப்படும் டேங்கர் லாரி தண்ணீர் கலங்களாகவும், குடிப்பதற்கும், மருத்துவ தேவைகளுக்கு பயன்படுத்த முடியாத நிலையில் இருப்பதாகவும் மருத்துவர் சுரேஷ் தெரிவித்தார்.