ஜல்லிக்கட்டு விதிமுறைகள் வெளியீடு

சென்னை: ஜல்லிக்கட்டு அவசரச் சட்டம் தொடர்பாக வெளியிடப்பட்டுள்ள அரசாணையில் அதற்கான விதிமுறைகள் இடம் பெற்றுள்ளன.

பீட்டாவை தடை செய்ய வேண்டும். தமிழகத்தில் ஜல்லிக்கட்டை நடத்த வேண்டும். காட்சிப் படுத்தப்பட்ட விலங்குகள் பட்டியலிலிருந்து காளையை நீக்க வேண்டும். ஜல்லிக்கட்டு போட்டியை நடத்த நிரந்தர தீர்வு தேவை என்பன உள்ளிட்ட பல்வேறு கோரிக்கைகளை வலியுறுத்தி தமிழகம் முழுவதும் போராட்டங்கள் நடைபெற்று வருகின்றன.

இளைஞர்களின் எழுச்சி மிகுந்த போராட்டத்தையடுத்து, ஜல்லிக்கட்டு போட்டிகளை நடத்தும் பொருட்டு தமிழக அரசு அவசரச் சட்டம் ஒன்றை கொண்டு வந்துள்ளது. ஆனால், நிரந்தர தீர்வு தேவை என தெரிவித்துள்ள இளைஞர்கள் தொடர் போராட்டத்தில் ஈடுபட்டு வருகின்றனர்.

இந்நிலையில், ஜல்லிக்கட்டு தடையை நீக்கும் வகையில் பிறப்பிக்கப்பட்ட அவசர சட்டம் அரசிதழில் வெளியிடப்பட்டுள்ளது. இதுதொடர்பாக தமிழக அரசு வெளியிட்டுள்ள அரசாணையில் ஜல்லிக்கட்டு நடத்துவதற்கான விதிமுறைகள் இடம் பெற்றுள்ளன.

அதில், ஜல்லிக்கட்டில் பங்கேற்கும் காளைகள், மாடுபிடி வீரர்கள் குறித்த விவரத்தை அளித்து மாவட்ட ஆட்சியரிடம் முன்அனுமதி பெற்றிருக்க வேண்டும். ஜல்லிக்கட்டு நடத்த விரும்பும் தனிநபர், அமைப்பு அல்லது குழு, மாவட்ட ஆட்சியரிடம் முன்கூட்டி விண்ணப்பிக்க வேண்டும். ஆட்சியரின் அனுமதி கிடைத்ததும், ஜல்லிக்கட்டு நடைபெறும் நாள், இடம் ஆகியவற்றை அரசு வெளியிடும்.
ஜல்லிக்கட்டில் பங்கேற்கும் காளைகள் களத்துக்கு கொண்டு வரப்படுவதற்கு முன்பு 20 நிமிடங்கள் ஓய்வளிக்கப்பட வேண்டும். காளைகள் நிறுத்தப்படும் இடத்தில் அவற்றுக்கு இடையே 60 சதுர அடி அளவில் போதிய இடைவெளி அளிப்பதுடன், பாதுகாப்பாக உணர காளையின் உரிமையாளர் அருகில் இருக்க வேண்டும். காளைகள் நிறுத்தப்படும் இடத்தில் மழை, வெயில் பாதிக்காமல் கூடாரம் அமைத்திருக்க வேண்டும்.

ஜல்லிக்கட்டு நடைபெறும் பகுதியின் முக்கிய இடங்களில் கண்காணிப்புக் கேமராக்கள் அமைக்கப்பட வேண்டும்.மது உள்ளிட்ட எதையும் காளைகளுக்கு வழங்கப்படாததை உறுதி செய்வதுடன், காளையை அடக்குவோர் 15 மீட்டர் தூரத்திற்கு திமிலை மட்டுமே பிடித்துக் கொண்டு செல்லல வேண்டும். வால் போன்றவற்றை பிடிக்கக் கூடாது. ஜல்லிக்கட்டில் விதிமுறைகள் கடைபிடிக்கப்படுவதை குழு அமைத்து கண்காணிக்கப்பட வேண்டும் என கூறப்பட்டுள்ளது.
Rules for jallikattu that places in jallikattu ordinance