ஜன., 12-ல் சசிகலா முதல்வராக பதவியேற்பு ?

சென்னை : தமிழக முதல்வராக அதிமுக பொதுச் செயலாளர் சசிகலா வரும் ஜனவரி 12-ம் தேதி பதவியேற்க உள்ளதாக சமூக வலைதளங்களில் ஒரு தகவல் பரவி வருகிறது.

தமிழக முதல்வராக இருந்த ஜெயலலிதா கடந்த மாதம் 5-ம் தேதி உயிரிழந்தார். அதனை தொடர்ந்து தமிழக முதல்வராக பன்னீர் செல்வம் பதவியேற்றார். மேலும் அதிமுகவின் பொதுச் செயலாளராக வி.கே.சசிகலா டிசம்பர் 31-ம் தேதி பதவியேற்றார்.

இந்தநிலையில் தமிழக முதல்வராக சசிகலா பதவியேற்க வேண்டும் என்று மக்களவை துணை சபாநாயகர் தம்பிதுரை, தமிழக அமைச்சர் உதயகுமார் உள்ளிட்டோர் வலியுறுத்தினார்கள். இந்தநிலையில் சில தினங்களுக்கு முன்பு முதல்வர் பன்னீர் செல்வம் போயஸ் கார்டன் சென்று சசிகலாவை சந்தித்தார். அப்போது அவர் தான் முதல்வர் பதவியை ராஜினாமா செய்ய தயாராக இருப்பதாக கூறினார் என்று தகவல்கள் வெளியாகின.

தற்போது அதிமுக பொதுச் செயலாளர் சசிகலா வரும் ஜனவரி 12-ம் தேதி பதவியேற்க உள்ளதாக சமூக வலைதளங்கள் ஒரு தகவல் பரவி வருகிறது.மேலும் ஜனவரி 12-ம் தேதி பௌவுர்ணமி தினம் என்பதால் சசிகலா அன்று பதவி ஏற்க இருப்பதாகவும் தகவல்கள் வெளியாகியுள்ளது.