ஆப்நகரம்

'இங்கு 8 மணி நேர வேலை என்பதே அதிகம்', 12 மணி நேர வேலை மசோதா வாபஸ் - சீமான் ரியாக்ஷன்

12 மணி நேர வேலை மசோதா திரும்ப பெறப்படுவதாக தமிழக அரசு அறிவித்ததை குறித்து சீமான் கருத்து தெரிவித்துள்ளார்.

Authored byதிவாகர் மேத்யூ | Samayam Tamil 1 May 2023, 1:50 pm
தமிழக சட்டப்பேரவையில் 12 மணி நேர வேலை மசோதாவை கூட்டணி மற்றும் எதிர் கட்சிகளின் கடுமையான எதிர்ப்புகளுக்கு மத்தியில் திமுக அரசு கொண்டு வந்தது. இதனால் அதிர்ச்சி அடைந்த கார்ப்பரேட் தொழிலாளர்கள் கலக்கம் அடைந்தனர். இந்த மசோதாவுக்கு கட்சி பாகுபாடின்றி பலரும் எதிர்ப்பு தெரிவித்து தெரிவித்து வந்தனர். தேசிய அளவில் பெரிய விவாத பொருளாக இது மாறியது. இதற்கு விளக்கம் அளித்த தமிழக அரசு '' தொழிலாளர்களுக்கு விருப்பம் இல்லை என்றால், நிச்சயமாக அரசு பரிசீலனை செய்து ஆய்வு செய்து தான் நடைமுறைப்படுத்தும் என்பதைத் தெரிவித்துக் கொள்கிறேன்.
Samayam Tamil seeman


வாரத்தில் 48 மணி நேரம் என்பதில் எந்த மாற்றமும் இல்லை. இன்னொன்று, எல்லா நிறுவனங்களுக்கும் இந்த சட்டத்திருத்தம் பொருந்தாது. எந்த நிறுவனம், எந்த தொழிற்சாலை விரும்புகிறதோ அந்தத் தொழிற்சாலையில் பணியாற்றுகின்ற தொழிலாளர்கள் விரும்பினால் மட்டுமே இது பொருந்தும்'' என தெரிவித்தது.

இருப்பினும் தொழிற்சங்கங்களும், அரசியல் கட்சிகளும் தொடர்ந்து எதிர்ப்பு தெரிவித்து வந்ததால் மசோதா நிறுத்தி வைக்கப்பட்டது. இந்த நிலையில், முதல்வர் ஸ்டாலின் 12 மணி நேர வேலை மசோதா திரும்ப பெறப்படுவதாக அறிவித்தார். மசோதா வாபஸ் குறித்து அனைத்து சட்டமன்ற உறுப்பினர்களுக்கும் எழுத்துப்பூர்வமாக விரைவில் தெரிவிக்கப்படும் என்றும் அவர் கூறினார். இந்த அறிவிப்பை அரசியல் கட்சிகளும், தொழிற்சங்கங்களும் வரவேற்றுள்ள நிலையில் நாம் தமிழர் சீமான் இதுகுறித்து கருத்து தெரிவித்துள்ளார். இன்று சென்னையில் செய்தியாளர்களை சந்தித்தவர் பேசியதாவது;

8 மணி நேரம் வேலை சட்டத்துக்கு எத்தனையோ பேர் உயிர் தியாகம் செய்துள்ளனர். மனிதனுடைய மூளையே 20 நிமிஷத்துக்கு மேல் ஒரு விஷயத்தில் கவனம் செலுத்தாது என்கிறார்கள். அதற்கு மேல் வெவ்வேறு சிந்தனைக்கு போய்விடுகிறதாம். உடலும் அப்படிதான். ஒருவர் 12 மணி நேரம் அயராமல் உழைத்தால் உடல் என்னவாகும் என்பதை பார்க்க வேண்டும்.


12 மணி நேர வேலை சீனாவில் இருப்பதாகவும் அதை பன்னாட்டு நிறுவனங்கள் விரும்புவதாகவும் சொல்கிறீர்கள். இது யாருக்கான அரசு? மக்களுக்கான அரசா பன்னாட்டு நிறுவனங்களுக்கான அரசா? எதற்கெடுத்தாலும் சீனாவை எடுத்துக்காட்டாக எடுக்கக்கூடாது. சீனாவில் இருக்கும் வளர்ச்சி இங்கு இருக்கிறதா? சீனா கடைபிடிப்பதை இந்தியா கடைபிடிக்கிறதா? இங்கு சட்டம் என்பது இங்கு இருக்கிற மக்களின் வாழ்வாதாரம், சூழ்நிலையை பொருத்துதான் தீர்மானிக்க வேண்டும்.

இங்கு 8 மணி நேர வேலை என்பதே அதிகம். இதில் 12 மணி நேரம் வேலை சட்டத்தை கொண்டு பன்னாட்டு நிறுவனங்கள் விரும்புகிறது என்றால் அது யாருக்கான ஆட்சி? இந்த சட்டம் எப்படியும் நிறைவேறாது என்று எனக்கு தெரியும். இதனை ஒத்திவைக்கக்கூடாது திரும்ப பெற வேண்டிய சட்டம் இது. தமிழக அரசு அதை திரும்பப்பெற்றிருப்பது வரவேற்கத்தக்கது என சீமான் கூறினார்.
எழுத்தாளர் பற்றி
திவாகர் மேத்யூ
திவாகர். நான் தொலைக்காட்சி, நியூஸ் ஆப், செய்தி இணைதளம் என ஊடக துறையில் 5 ஆண்டுகளுக்கும் மேலாக பயணித்து வருகிறேன். எழுத்தின் மீதான ஆர்வமும் ஊடகத்தின் மீது இருக்கும் பற்றால் இத்துறையை தேர்வு செய்துள்ளேன். அரசியல், குற்றம், அரசியல் - குற்றம் சார்ந்த அலசல், அரசு சார்ந்த செய்திகளை எவ்வித சமரசமும் இல்லாமல் எழுதி வருகிறேன். கடந்த 3 ஆண்டுகளாக TIMES Of INDIA சமயம் தமிழில் Senoir Digital Content Producer ஆக பணியாற்றுகிறேன்.... மேலும் படிக்க

அடுத்த செய்தி