Karunanidhi: திமுக தலைவர் கருணாநிதியின் உடல்நிலை குறித்து விசாரித்த சிவகார்த்திகேயன்!!

உடல்நலக்குறைவால் மருத்துவமனையில் அனுமதிக்கப்பட்டுள்ள திமுக தலைவர் கருணாநிதியின் உடல்நிலை குறித்து, முக ஸ்டாலினிடம் நடிகர் சிவகார்த்திகேயன் கேட்டறிந்தார்.

திமுக தலைவரான கருணாநிதிக்கு, கடந்த சில தினங்களுக்கு முன் உடல்நலம் மோசமாக பாதிக்கப்பட்டது. இதனால், கடந்த வெள்ளிக்கிழமை இரவு, ஆம்புலன்ஸ் மூலம் உடனடியாக காவேரி மருத்துவமனைக்கு அழைத்துச் செல்லப்பட்டார்.

மருத்துவமனையில் அவருக்கு மருத்துவர்கள் தீவிர சிகிச்சை அளித்து வரும் நிலையில், காங்கிரஸ் தலைவர் ராகுல்காந்தி, துணை குடியரசுத் தலைவர் வெங்கையா நாயுடு, ஆளுநர் பன்வாரிலால் புரோஹித், தமிழக முதல்வர் எடப்பாடி பழனிச்சாமி, துணை முதல்வர் ஓ.பன்னீர்செல்வம், அதிமுக அமைச்சர்கள், மதிமுக தலைவர் வைகோ, சீமான் உள்ளிட்ட பல்வேறு அரசியல் கட்சி தலைவர்களும் மருத்துவமனைக்கு வந்து கருணாநிதியின் உடல்நிலை குறித்து விசாரித்துச் செல்கின்றனர்.

அதேபோல், சினிமா பிரபலங்களான ரஜினி, கமல், விஜய், அஜித், சூர்யா, சிவகுமார், விஜய் ஆண்டனி, விவேக், கவுண்டமணி, தமிழ் திரைப்பட இயக்குநர்கள் சங்க நிர்வாகிகள் உள்ளிட்ட பலரும் அவரின் உடல்நலம் குறித்து விசாரித்து சென்றனர்.

இந்நிலையில், தமிழ் சினிமாவின் வளர்ந்து வரும் ஹீரோக்களில் ஒருவரான நடிகர் சிவகார்த்திகேயன், கலைஞர் கருணாநிதியின் உடல்நிலை குறித்து அறிய, காவேரி மருத்துவமனைக்கு வந்தார். அங்கு, திமுக செயல் தலைவர் மு.க.ஸ்டாலினைச் சந்தித்து, கருணாநிதியின் உடல்நலம் குறித்து கேட்டறிந்தார்.

இந்தச் சந்திப்பின் போது, கருணாநிதியின் மகளும் எம்பியுமான கனிமொழி உடனிருந்தார் என்பது குறிப்பிடத்தக்கது.