ஸ்மார்ட் கார்டு பரிதாபங்கள்: விநாயகரை வீட்டுத்தலைவராக்கிய விநோதம்!

திருப்பூர்: திருப்பூரில் வழங்கப்பட்ட ஸ்மார்ட் கார்டு ஒன்றில் வீட்டுத்தலைவரின் படத்திற்குப் பதிலாக விநாயகர் படம் இடம்பெற்ற சம்பவம் அங்கு அதிர்ச்சியை ஏற்படுத்தியுள்ளது.

சில தினங்களுக்கு முன்பு, சேலம் ஓமலூரில் பெண் ஒருவருக்கு நடிகை காஜல் அகர்வால் படம் உடைய ஸ்மார்ட் கார்டு வழங்கப்பட்டது. சர்ச்சையை ஏற்படுத்திய இந்த சம்பவத்திற்குப் பிறகு, அவருக்கு மாற்று ஸ்மார்ட் கார்டு வழங்கப்பட்டது.

இந்நிலையில், திருப்பூரில் உள்ள வடுகபாளையம் ஊராட்சியைச் சேர்ந்த நல்லசிவம் (47) என்பவருக்கு வழங்கப்பட்ட ஸ்மார்ட் கார்டில் குடும்பத் தலைவர் படத்திற்குப் பதிலாக விநாயகர் படம் இடம்பெற்றிருந்தது பெரும் அதிர்ச்சியை ஏற்படுத்தியுள்ளது.

இதுகுறித்து, ரேசன் கடை ஊழியர்களைக் கேட்டபோது, தங்களுக்கு எதுவும் தெரியாது எனவும், இ-சேவை மையத்திற்கு சென்று மாற்றிக் கொள்ளுமாறும் கூறியுள்ளனர்.

இதேபோல் தர்மபுரியைச் சேர்ந்த மகேஷ் சின்னசாமி என்பவரின் ஸ்மார்ட் கார்டில் செருப்புக் காலின் படமும், மற்றொருவருக்கு நாயின் படமும் குடும்பத் தலைவர் படத்திற்குப் பதிலாக இடம்பெற்றிருந்தது குறிப்பிடத்தக்கது. ஸ்மார்ட் கார்டு பரிதாபங்களால் மக்கள் தத்தளித்து வருகின்றனர்.

Smart card has Lord Ganesha’s photo instead of the Householder’s photo in Tirupur.