ஸ்மார்ட் ரேஷன் கார்டில் நடிகை படம்: அரசு விளக்கம்

சென்னை: தமிழகத்தில் வழங்கப்பட்டுள்ள ஸ்மார்ட் ரேஷன் கார்டுகளில் நடிகையின் படம் இடம்பெற்றது எப்படி என்று உணவுத்துறை அமைச்சர் காமராஜ் விளக்கம் அளித்துள்ளார்.

தமிழகத்தில் முன்னாள் முதல்வர் ஜெயலலிதா 2011ஆம் ஆண்டில் ஆட்சிக்கு வந்தபோது ஸ்மார்ட் ரேஷன் கார்டு திட்டத்தை அறிமுகப்படுத்துவதாக அறிவித்தார். ரேஷன் கார்டுகளில் கூடுதலாக தாள் ஒட்டும் அவலநிலைக்கு முற்றுப்புள்ளி வைப்பதாகத் தெரிவித்தார். ஆனால், பல ஆண்டுகளாக அந்த திட்டம் நடைமுறைக்கு வருவதாகத் தெரியவில்லை. அதற்குள் ஜெயலலிதாவின் அப்போதைய ஆட்சி முடிந்து மீண்டும் ஆட்சி அமைத்து, ஓராண்டு முடிவதற்குள் காலமாகிவிட்டார்.

பின்னர், ஓபிஎஸ் சிறிது காலம் முதல்வராக இருந்து, பின் தற்போதைய முதல்வர் எடப்பாடி முதல்வரானதும் ஸ்மார்ட்கார்டு திட்டம் அவசர கதியில் நடைமுறைக்கு வந்துள்ளது. இதில் பல கோளாறுகள் ஏற்பட்டுள்ளன. குறிப்பாக, பல ஸ்மார்ட் ரேஷன் கார்டுகளில் குடும்பத் தலைவரின் படத்திற்குப் பதிலாக நடிகைகளின் படம் இடம்பெற்றிருப்பதாக புகார்கள் குவிந்துள்ளன.

இந்நிலையில், தற்போது நடைபெற்று வரும் சட்டப்பேரவை கூட்டத்தொடரில் குளச்சல் தொகுதி காங்கிரஸ் எம்எல்ஏ பிரின்ஸ் ஸ்மார்ட் கார்டுகளில் நடிகைகளின் படம் வருவது ஏன் என்று தமிழக அரசுக்கு கேள்வி எழுப்பினார்.

இதற்கு பதிலளித்த உணவுத்துறை அமைச்சர் காமராஜ், “பொதுமக்கள் தங்கள் மொபைnsnf உணவு பொருள் வழங்கல் அப்ளிகேஷன் மூலம் புகைப்படத்தை அப்லோட் செய்யும் போது தவறான புகைப்படத்தை அப்லோட் செய்துவிட்டனர். இதுதான் குளறுபடிக்குக் காரணம்” என்று அரசின் அலட்சியத்தை பொதுமக்களின் கவனக்குறைவாக மாற்றிக்கூறி எஸ்கேப் ஆனார்.