ஐ பேக்கை கைவிடாத ஸ்டாலின்? திகிலில் மாவட்டச் செயலாளர்கள்!

சட்டமன்றத் தேர்தலில் வெற்றி பெறுவதற்காக திமுக பல்வேறு வியூகங்களை வகுத்தது. தீவிர பிரச்சாரத்தை முன்னெடுத்தது. அதில் முக்கியமானது ஐ பேக் நிறுவனத்துடன் ஒப்பந்தம் செய்தது. பயணத் திட்டம், பிரச்சார வியூகம் மட்டுமல்லாமல் எந்த தொகுதியில் யாரை நிறுத்தினால் வெற்றி வாய்ப்பு இருக்கும் என்பது வரை ஐ பேக் டீம் ஸ்டாலினுக்கு தகவல் கொடுத்து வந்தது.

ஐபேக் உடன் ஒப்பந்தம் செய்த போதே திமுக முக்கிய புள்ளிகள் சிலர் அதற்கு அதிருப்தி தெரிவித்தனர். அவர்களில் மறைந்த திமுக எம்.எல்.ஏ ஜெ.அன்பழகனும் ஒருவர். கட்சி நிர்வாகிகளுக்கு கொடுக்கும் முக்கியத்துவத்தை ஐபேக் டீமுக்கு அதிகம் அளிக்கப்படுவதாக குற்றம் சாட்டினர். கட்சி நிர்வாகிகள், ஐ பேக் டீம் இருவரது கருத்தையும் உள்வாங்கி ஸ்டாலின் முடிவெடுத்து தேர்தலிலும் வெற்றி பெற்று ஆட்சியமைத்தார்.

ஐபேக் இல்லாமலே வெற்றி பெற்றிருக்கலாம், தற்போது வெற்றிக்கு அவர்கள் தான் காரணம் என்பது போல் கூறப்படுகிறது என்ற பேச்சும் திமுகவினர் மத்தியிலேயே நிலவியது. தேர்தல் சமயத்தில் ஐபேக் டீமுடன் போடப்பட்ட ஒப்பந்தம் முடிவுக்கு வந்துவிட்டாலும் அவர்களில் சிலர் இன்னும் திமுக தலைவர் ஸ்டாலினுக்கு சில ரிப்போர்டுகளை வழங்கி வருவதாக சொல்கிறார்கள் விவரம் அறிந்தவர்கள்.

அதிமுகவை அழிக்க பாஜக திட்டம்: விழித்துக் கொள்வாரா எடப்பாடி?

கட்சி நிர்வாகிகளின் செயல்பாடு, அமைச்சர்களின் செயல்பாடு ஆகியவை குறித்து ஸ்டாலின் தரப்புக்கு முக்கியமான இடத்திலிருந்தெல்லாம் ரிப்போர்ட் வந்துவிடுகிறது என்றாலும் ஐபேக் டீமில் இடம்பெற்றவர்களையும் அதற்கு பயன்படுத்தி வருவதாக சொல்கிறார்கள்.

அந்த டீம் வழங்கும் ரிப்போர்ட்டை ஸ்டாலின் தரப்பு மற்ற ரிப்போர்ட்களுடன் ஒப்பிட்டு பார்த்து முடிவெடுத்து வருவதாக சொல்கிறார்கள். உள்ளாட்சித் தேர்தல் சமயத்தில் கட்சி அறிவிப்புக்கு கட்டுப்படாமல் இருந்தவர்கள், தர்ம சங்கடத்துக்கு ஆளாக்கியவர்கள், அவர்களுக்கு துணை நின்றவர்கள் என பலர் குறித்தும் அந்த டீம் ஸ்டாலின் தரப்புக்கு ரிப்போர்ட் வழங்கியுள்ளதாம். மாவட்டச் செயலாளர்கள் கூட்டத்தில் முதல்வர் ஸ்டாலினின் பேச்சுக்கு பின்னணியில் இது இருக்கலாம் என்கிறார்கள்.