ஜி ஸ்கொயர் ரெய்டு விவகாரம்.. அப்செட்டான ஸ்டாலின்.. உடனடியாக நடந்த அதிரடி மாற்றம்!

சென்னை: திமுக அரசியல் வட்டாரத்தில் சமீபகாலமாக சலசலப்புக்கும், பரபரப்புக்கும் பஞ்சமே இல்லாமல் ஓடிக்கொண்டிருக்கிறது. அந்த வகையில், லேட்டஸ்ட்டாக கசிந்திருக்கும் தகவல் திமுகவினருக்கு ஒரு எச்சரிக்கை சிக்னலை கொடுத்திருக்கிறது. தனது மருமகன் சபரீசனுக்கு முதல்வர் மு.க. ஸ்டாலின் கண்டிப்புடன் சில அட்வைஸ்களை வழங்கியதாக என அறிவாலய வட்டாரங்கள் தெரிவிக்கின்றன.

தனது குடும்ப உறுப்பினர்களின் பெயர், சமீபகாலமாக அரசியலில் அடிப்படுவது முதல்வருக்கு கடும் அதிருப்தியை ஏற்படுத்தி இருக்கிறது. குறிப்பாக, அமைச்சர் பிடிஆர் பேசியதாக வெளியான ஆடியோவில் மகன் உதயநிதி குறித்தும், மருமகன் சபரீசன் குறித்தும் பல விஷயங்கள் பேசப்பட்டு இருந்தன.

ஆட்சிக்கு வந்த இரண்டே ஆண்டுகளில் உதயநிதியும், சபரீசனும் தங்கள் மூதாதையர்களை விட பல மடங்கு சம்பாதித்துவிட்டனர் என அந்த ஆடியோவில் தெரிவிக்கப்பட்ட விஷயம் தமிழகத்தின் பட்டித்தொட்டி எல்லாம் பேசுபொருளானது.

ஜி ஸ்கொயர் ரெய்டு: தனக்கு பிறகு திமுகவை கட்டிக் காப்பாற்றுவதற்காக அமைச்சர் உதயநிதி ஸ்டாலினுக்கு பல ஆண்டுகளாக கட்டமைத்து வந்த பிம்பம் இந்த விவகாரத்தில் நொறுங்கிபோனது ஸ்டாலினை கவலை அடையச் செய்தது. இதன் தொடர்ச்சியாகவே, பிடிஆரை மையப்படுத்திய அமைச்சரவை மாற்றமும் அரங்கேறியது. இது ஒருபுறம் இருக்க, திமுக மேலிடத்துடன் நெருக்கமான தொடர்பில் இருக்கும் ஜி ஸ்கொயர் ரியல் எஸ்டேட் நிறுவனத்தில் நடந்த ரெய்டு அரசியல் களத்தில் பெரும் அதிர்வலைகளை ஏற்படுத்தியது.
அடிமடியிலேயே கை வைத்த அமித் ஷா.. எடப்பாடியை பணிய வைக்க போட்ட 'ஸ்கெட்ச்'.. பதறும் அதிமுக தலைகள்!
அடிபட்ட சபரீசன் பெயர்: தமிழகம் மட்டுமின்றி கேரளா, கர்நாடகா ஆந்திராவில் உள்ள ஜி ஸ்கொயர் நிறுவனங்களிலும் இந்த ரெய்டுகள் நடந்தன. இதன் ஒருபகுதியாக, சென்னை அண்ணாநகர் தொகுதி திமுக எம்எல்ஏ மோகன் வீட்டிலும், அவரது மகன் கார்த்திக் வீட்டிலும் ரெய்டு நடந்தது பெரும் பரபரப்பாக பேசப்பட்டது. எம்எல்ஏ மோகனின் மகன் கார்த்திக் ஜி ஸ்கொயர் நிறுவனத்துடன் நெருங்கிய தொடர்பில் உள்ளவர் எனக் கூறப்படுகிறது. கார்த்திக்குக்கு சபரீசன் மிகவும் நெருக்கமானவர் என்பதால் ஜி ஸ்கொயர் நிறுவன ரெய்டிலும் சபரீசன், உதயநிதி பெயர்களும் அடிபட்டன.

அப்செட் ஆன ஸ்டாலின்: இதுதான் ஸ்டாலினை அதிருப்திக்கு உள்ளாக்கியதாக தெரிகிறது. கடந்த 2011-இல் திமுக ஆட்சியை இழந்ததற்கு அக்கட்சியினர் செய்த சில விஷயங்கள்தான் காரணம் என்பதை முதல்வர் மறக்கவில்லை. இந்நிலையில்தான், அண்மையில் தனது மருமகன் சபரீசனிடமும், எம்எல்ஏ மோகனின் மகன் கார்த்திக்கிடமும் கண்டிப்புடன் சில அட்வைஸ்களைக் கொடுத்ததாக தகவலறிந்த வட்டாரங்கள் தெரிவிக்கின்றன.

அகற்றப்பட்ட விளம்பரங்கள்: பெயர் ஒரு முறை கெட்டுப் போய்விட்டால் அரசியலில் கால் வைக்க முடியாது என கார்த்திக்கிடம் ஸ்டாலின் கூறினாராம். அதேபோல, மருமகன் சபரீசனிடம், இனி தமிழ்நாட்டில் எங்குமே ஜி ஸ்கொயர் நிறுவனத்தின் விளம்பரங்கள் இருக்கக்கூடாது எனக் கூறினாராம். இதையடுத்து, இரவோடு இரவாக அந்நிறுவனம் தொடர்பான விளம்பரப் பலகைகள் அனைத்தும் அவசர அவசரமாக அகற்றப்பட்டு இருப்பதாக கூறப்படுகிறது.

அதிரடி ஆக்சன்: மேலும், பத்திரிகைகளிலும் ஜி ஸ்கொயர் விளம்பரங்கள் ஏதும் வருவதில்லை. அதுமட்டுமல்லாமல், அந்நிறுவனம் சார்பில் நிலங்களை 'லே அவுட்' போடுவதற்கான 15-க்கும் மேற்பட்ட விண்ணப்பங்களையும் நிறுத்தி வைக்க உத்தரவு பறந்திருப்பதாக கூறுகின்றனர் விவரம் அறிந்தவர்கள். முதல்வர் இதே வேகத்தில் கட்சிக் கட்டுப்பாட்டை மீறி நடக்கும் மூத்த தலைவர்கள், அமைச்சர்கள், எம்எல்ஏக்கள் பக்கமும் திரும்பலாம் என்றும் கூறப்படுவதால் திமுக பெருந்தலைகள் சற்று கிலியுடனேயே இருக்கிறார்களாம்.