முடிசூட்டு விழாவுக்கு தயாராகும் உதயநிதி.. வெயிட்டான துறைக்கு இனி அமைச்சர்..!

தமிழகத்தில் 10 ஆண்டுகளுக்கு பிறகு திமுக ஆட்சியை பிடித்துள்ளது. முதல்வர் ஸ்டாலின் தலைமையிலான அரசு பொறுப்பேற்ற போதே, அவரது மகன் உதயநிதிக்கு அமைச்சர் பொறுப்பு வழங்கப்படும் என எதிர்பார்க்கப்பட்டது. ஆனால், அமைச்சர் பட்டியலில் அவர் பெயர் இடம்பெறவில்லை. இருப்பினும், மக்கள் மத்தியில் அதிருப்தி எதையும் ஏற்படுத்தவில்லை. காரணம், எந்த சூழலிலும் தனது மகனுக்கு பதவிகள் வழங்கப்படாது என்று அறிவித்திருந்த மு.க. ஸ்டாலின் உதயநிதிக்கு இளைஞரணி செயலாளர் என்ற பெரிய பதவியை வழங்கினார்.

அதனை தொடர்ந்து சட்டமன்ற தேர்தலில் சேப்பாக்கம் - திருவல்லிக்கேணி தொகுதியில் வெற்றி பெற்று சட்டசபைக்கு சென்றார் உதயநிதி. ஏற்கனவே, முதல் முறையாக எம்.எல்.ஏ.,க்கள் நான்கு பேர், தற்போதைய அமைச்சரவையில் அமைச்சர்களாக பதவியேற்றுள்ளனர். அப்படிப்பட்ட சூழலில் உதயநிதி ஸ்டாலினை அமைச்சராக்குவதில் தவறில்லை என்று திமுக மூத்த தலைவர்களும் ஆதரவு தெரிவிக்கின்றனர்.

அவ்வாறு உதயநிதிக்கு அமைச்சர் பதவி கொடுக்கப்பட்டால் இளைஞர் நலன், விளையாட்டு, நகராட்சி நிர்வாகம் உள்ளிட்ட துறைகள் உதயநிதிக்கு ஆதரவாக உள்ளன. இந்த நிலையில், உதயநிதி அமைச்சராகும் காலம் நெருங்கிவிட்டதாக தகவல் வெளியாகியுள்ளது.

டிசம்பர் 16 ஆம் தேதி அன்று அல்லது அதற்கு முன்பு உதயநிதிக்கு அமைச்சர் பதவி கொடுத்து முடிசூட்டும் விழாவை கோலாகலமாக கொண்டாட அறிவாலயத்தில் ஆலோசனை நடந்து வருவதாக கூறப்பட்டது. இந்த நிலையில், உதயநிதி ஸ்டாலினுக்கு விளையாட்டு மற்றும் இளைஞர் மேம்பாட்டு இலாகா ஒதுக்கப்பட்டு டிசம்பர் 14 ஆம் தேதி பதவியேற்பு விழா நடத்த திமுக தலைமை திட்டமிட்டுள்ளதாக தகவல் வெளியாகியுள்ளது.

மேலும், விளையாட்டை மேம்படுத்தவும் இளைஞர்களின் வாக்குகளை ஈர்க்கவும் உதயநிதி மாநிலம் முழுவதும் சுற்றுப்பயணம் மேற்கொண்டு ஒவ்வொரு தொகுதியிலும் விளையாட்டு மைதானங்களை திறந்து வைக்க திட்டமிட்டுள்ளதாகவும் கூறப்படுகிறது.