“வீடியோவில் இருப்பது நான் தான், ஆனால் குரல் என்னுடையதல்ல” : மறுக்கும் சரவணன் எம்எல்ஏ!

சென்னை : டைம்ஸ் நவ் தொலைக்காட்சி மற்றும் மூன் டிவி இணைந்து மேற்கொண்ட ஸ்டிங் ஆப்ரேஷன் வீடியோவில் இருப்பது தான் எனவும், ஆனால் குரல் டப்பிங் செய்யப்பட்டுள்ளதாகவும் மதுரை தெற்கு எம்எல்ஏ சரவணன் கூறியுள்ளார்.

எடப்பாடி பழனிச்சாமிக்கு ஆதரவாக சட்டப்பேரவையில் நம்பிக்கை வாக்கெடுப்பு எடுக்கப்பட்டதற்கு முன்பு சசிகலா அணி அதிமுக எம்எல்ஏக்களிடம் பேரம் பேசியதாக சரவணன் எம்எல்ஏ பேசும் வீடியோ ஒன்று நேற்று வெளியானது. டைம்ஸ் நவ் தொலைக்காட்சியும், மூன் டிவியும் இணைந்து இந்த ஸ்டிக் ஆப்ரேஷனை நடத்தியுள்ளன. இதனையடுத்து மதுரை தெற்கு எம்எல்ஏ சரவணன் சென்னை வந்தார்.
சென்னை வந்து முன்னாள் முதல்வர் ஓ.பன்னீர் செல்வத்தை சந்தித்தார். அதன் பின்னர் செய்தியாளர்களிடம் பேசிய அவர், வீடியோவில் இருப்பது நான் தான் என்றாலும், குரல் என்னுடைய இல்லை என்று கூறியுள்ளார். குரல் டப் செய்யப்பட்டுள்ளது. சட்ட ஆலோசகர்களுடன் கலந்தாலோசித்து புகார் அளிக்க போவதாகவும் சரவணன் எம்எல்ஏ கூறியுள்ளார்.

நேற்று மாலை சென்னைக்கு ரயில் ஏறியவுடன் தான் இந்த வீடியோ குறித்து எனக்கு தெரியவந்தது. இன்று காலை சென்னை வந்தவுடன் தான் வீடியோவை பார்த்தேன். என்னுடைய வீடியோவை எடுத்து குரலை மட்டும் டப் செய்துள்ளனர் என்று சரவணன் கூறினார்.

இதற்கிடையே ஸ்டிங் ஆப்ரேஷன் மேற்கொண்ட மூன் டிவியின் நிர்வாக இயக்குநர் ஷாநவாஸ் கான் தன் குரலை டப்பிங் செய்துள்ளனர் என்று எம்எல்ஏ சரவணன் கூறியுள்ளதை முற்றிலுமாக மறுத்துள்ளார். சரவணன் எம்எல்ஏ வந்ததும் சால்வை போத்தி அவரை வரவேற்று இருவரும் பேச தொடங்கினோம். அந்த வீடியோவில் பேசியிருப்பது சரவணன் தான். எனக்கு அவர் குரலை டப்பிங் செய்ய வேண்டும் என்ற அவசியம் இல்லை என்றும் ஷாநவாஸ் கான் கூறியுள்ளார்.