மதுரை சாலை விபத்தில் 17 வயது மாணவன் உயிரிழப்பு!

மதுரையில் பைக் மீது டேங்கர் லாரி மோதிய விபத்தில், 17 வயது மாணவன் சம்பவ இடத்திலேயே உயிரிழந்த சம்பவம் சோகத்தை ஏற்படுத்தியுள்ளது.

மதுரை, ஒத்தக்கடை பகுதியைச் சேர்ந்த அஜித்(17) என்ற மாணவன், ஒய்.டபிள்யூ.சி.ஏ மெட்ரிக்குலேஷன் பள்ளியில் 12ஆம் வகுப்பு படித்து வருகிறான். இன்று காலை வழக்கம்போல பள்ளி கிளம்பிய அஜித், சாலையில் டூவிலரில் சென்றுகொண்டிருந்த விஸ்வநாதபுரத்தைச் சேர்ந்த விக்னேஷ்(30) என்பவரிடம் லிஃப்ட் தருமாறு கேட்டுள்ளான்.

இந்நிலையில் இருவரும், நத்தம் சாலையில் உள்ள டீன் குவாட்ரஸ் அருகே சென்று கொண்டிருந்த போது பின்னாடி வந்த டேங்கர் லாரி எதிர்பாரதவிதமாக டூவிலரில் மோதியது.

இந்த விபத்தில் டேங்கர் லாரி டையரில் சிக்கிய அஜித், சம்பவ இடத்திலேயே உடல்நசுங்கி உயிரிழந்தார். டூவிலரை ஒட்டிய விக்னேஷ் லேசான காயங்களுடன் உயிர்தப்பினார்.

இதுகுறித்து தகவலறிந்த தல்லாகுளம் காவல்துறையினர் சம்பவ இடத்திற்கு விரைந்து, உயிரிழந்த மாணவனின் உடலை மீட்டு, பிரேத பரிசோதனைக்காக ராஜாஜி அரசு மருத்துவமனைக்கு அனுப்பி வைத்தனர்.

இதுகுறித்து காவல்துறையினர் கூறுகையில், டூவிலரின் பின்னிருக்கையில் அமர்ந்து பயணம் செய்பவர்களுக்கு ஹெல்மெட் கட்டாயமாக்கப்பட்டுள்ளது. ஒருவேளை அந்த மாணவன் ஹெல்மெட் அணிந்து பயணம் செய்திருந்தால் சிறிய காயங்களுடன் உயிர் தப்பித்திருக்கலாம் என்று தெரிவித்தனர்.