தம்பிதுரையின் கருத்து அவரது தனிப்பட்ட கருத்து- தமிழிசை

தம்பிதுரை பாஜ.,-அதிமுக கூட்டணி அமைய வாய்ப்பில்லை என முன்னதாகத் தெரிவித்திருந்தார். தம்பிதுரையின் கருத்து அவரது தனிப்பட்ட கருத்து என்றுள்ளார் பாஜ., தமிழகத் தலைவர் தமிழிசை சவுந்தரராஜன்.

மக்களவை துணை சபாநாயகர் தம்பிதுரை முன்னதாக ரஃபேல் விவாகாரத்தில், ரஃபேல் போர் விமான ஒப்பந்தத்தை அனில் அம்பானியின் நிறுவனத்திடம் மத்திய அரசு கொடுத்தது ஏன் என கேள்வி எழுப்பி இருந்தார். இதனை ராகுல் காந்தி வரவேற்றார்.

இதனால் கடுப்பாகிய நிர்மலா சீதாராமன் உள்ளிட்ட பாஜ., மக்களவை உறுப்பினர்கள் தம்பிதுரைக்கெதிராக காரசாரமாக பதில் அளித்தனர்.

’அவரது கட்சியில் அவர் முடிவெடுக்கும் நிலையில் இல்லை. எனவே அவரது பேச்சை வைத்து கூட்டணி இல்லை என முடிவுக்கு வந்துவிட முடியாது. இருந்தாலும் அவர் தனிப்பட்ட முறையில் என்னுடைய நண்பர். ஆகவே இது பற்றி பேச்சை தொடர விரும்பவில்லை’ என்றுள்ளார் பாஜ., தேசிய செயலாளர் எச். ராஜா.

முன்னதாகபாஜ., அதிமுக கூட்டணி பங்கீடு நடந்துவிட்டதாகவும் ஆளுக்கு 20-20 தொகுதிகளை பிரித்துக்கொண்டுவிட்டதாகவும் பேச்சு அடிபட்டது. துணை சபாநாயகரும் அதிமுக உறுப்பினருமான தம்பிதுரை சமீப காலமாக பாஜ.,வை நாடாளுமன்றத்தில் கடுமையாக எதிர்த்து வருகிறார்.

ஆனால் முதல்வர் பழனிசாமி பாஜ.,வுடனும் மோடியுடனும் நல்லுறவில் உள்ளார். நாடாளுமன்றத் தேர்தலில் கூட்டணிக்கு வாய்ப்புள்ளதா என விரைவில் தெரிய வரும் என நம்பப் படுகிறது. நாமும் பொறுத்திருந்து பார்க்கலாம்.