தமிழகம், புதுவையில் இன்றும் கனமழைக்கு வாய்ப்பு

சென்னை உட்பட தமிழகத்தின் பல பகுதிகளில் நேற்று பரவலாக மழை பெய்த நிலையில், இன்றும், நாளையும் பரவலாக மழை பெய்ய வாய்ப்பு உள்ளதாக சென்னை வானிலை ஆய்வு மையம் தெரிவித்துள்ளது.

தமிழகத்தின் பல மாவட்டங்களில் வறட்சி ஏற்பட்டிருந்த நிலையில், நேற்று தலைநகர் சென்னை உட்பட மாநிலத்தின் பல பகுதிகளில் பரவலாக மழை பெய்தது. சென்னையில் இரவு 8 மணிக்கு மேல் கனமழை கொட்டித் தீர்த்தது. திருவள்ளூர், கடலூர், விருத்தாசலம், விழுப்புரம், ஈரோடு, திருண்டுக்கல், தேனி உள்ளிட்ட மாவட்டங்களிலும் கனமழை பெய்தது.

இந்நிலையில், பருவமழை மற்றும் வெப்பச்சலனம் காரணமாக தமிழகத்தின் வேலூர், திருவண்ணாமலை, விழுப்புரம், காஞ்சிபுரம், நீலகிரி, கோயம்புத்தூர், மதுரை, தேனி, திண்டுக்கல் ஆகிய மாவட்டங்களில் கனமழை பெய்ய வாய்ப்பு உள்ளதாக சென்னை வானிலை ஆய்வு மையம் தெரிவித்துள்ளது.

மேலும் சென்னை, திருவள்ளூர், கிருஷ்ணகிரி, கடலூர், நாகப்பட்டினம், தஞ்சாவூர், திருவாரூர், புதுக்கோட்டை, சிவகங்கை, திருச்சி, பெரம்பலூர், அரியலூர், திருநெல்வேலி ஆகிய மாவட்டங்களின் சில பகுதிகளில் மிதமான மழைக்கு வாய்ப்பு உள்ளதாக தெரிவிக்கப்பட்டுள்ளது.

தமிழகத்தின் பல பகுதிகளில் தண்ணீர் தட்டுப்பாடு நிலவி வந்த நிலையில் நேற்று பெய்த மழையால் வெப்பம் தணிந்து பொதுமக்கள் மகிழ்ச்சி அடைந்துள்ளனர்.