Breaking: 2021 இல் மிக பெரிய அதிசயத்தை தமிழக மக்கள் நிகழ்த்துவார்கள் : ரஜினி

சென்னை: கமல் 60 நிகழ்ச்சியில் கலந்துகொண்டு பேசிய ரஜினி '' அனைவரது வாழ்விலும் அதிசயம், அற்புதம் நிகழும். இரண்டு வருடங்களுக்கு முன்பு எடப்பாடி பழனிசாமியும் தான் முதல்வர் ஆவேனென்று நினைத்து பார்த்திருக்கமாட்டார்.

அவர் முதல்வர் ஆனதும் ஆட்சி கவிழும் என நினைக்காதவர்களே கிடையாது. ஆனால் ஆட்சி தொடர்ந்து நடைபெறுகிறது. அந்த அற்புதமும், அதிசயமும் நாளைக்கும் நடக்கும் என கூறினார்.

அதன் பிறகு செய்தியாளர்களை சந்தித்த அவர் தேவையும், நேரமும் வந்தால் கமலுடன் இணைந்து தமிழக மேம்பாட்டிற்கு பாடுபடுவேன் என தெரிவித்தார். இது அரசியல் வட்டாரத்தில் பெரும் சலசலப்பை ஏற்படுத்தியது.

சுற்றுலாப் பயணிகளை ஈர்க்கும் தமிழ்நாடு!

இந்நிலையில் சென்னை விமான நிலையத்தில் செய்தியாளர்களை சந்தித்த ரஜினியிடம் கமலுடன் கூட்டணி அமைத்தால் முதல்வர் வேட்பாளர் யார் என கேட்கப்பட்டது. அதற்கு கமலுடன் இணைந்தால் முதலமைச்சர் வேட்பாளர் யார் என்பது குறித்து அரசியல் சூழல் அடிப்படையில் அப்போது முடிவு எடுக்கப்படும்.

அதை குறித்து இப்போது பேச முடியாது. கட்சியின் நிர்வாகிகள், உறுப்பினர்களிடம் ஆலோசித்த பிறகுதான் அந்த முடிவு எடுக்கப்படும். மத்திய அரசு எனக்கு கொடுத்த வாழ்நாள் சாதனையாளர் விருதுக்கு தமிழக மக்கள்தான் காரணம். அந்த விருதினை அவர்களுக்கே சமர்ப்பிக்கிறேன். 2021 இல் பெரிய அற்புதத்தையும், அதிசயத்தையும் நூற்றுக்கு நூறு சதவீதம் தமிழக மக்கள் நிகழ்த்துவார்கள் என கூறினார்.