எம்.ஜி.ஆர் உடன் இருப்பது தமிழிசையா? நெட்டிசன்களின் வைரல் புகைப்படம்!

மறைந்த முன்னாள் முதல்வர் எம்.ஜி.ஆர் உடன் தமிழிசை சௌந்தரராஜன் இருப்பது போன்ற புகைப்படம் ஒன்று சமூக வலைதளங்களில் வைரலாகி வருகிறது.

சமூக வலைதளங்களில் மிகவும் பேசப்படும் அரசியல் தலைவர் தான் தமிழக பாஜக தலைவர் தமிழிசை சௌந்தரராஜன். சமூக வலைதளங்களில் இவருக்கு ஏகப்பட்ட ரசிகர்கள். இவர் பேச்சையும், அணியும் உடையும் நெட்டிசன்கள் அடிக்கடி கலாய்த்து வருவது வழக்கம். இதனை எப்போதும் பாசிட்டிவாக எடுத்துக் கொள்ளும் அரசியல் தலைவர் தான் தமிழிசை. சமீபத்தில், உங்களைப் பற்றி மீம்ஸ்கள் வந்துகொண்டே இருக்கிறது என்று செய்தியாளர்கள் கேள்வி எழுப்பினர். அதற்கு சிரித்துக் கொண்டே தமிழிசை, நன்றாக தான் இருக்கிறது. மீம்ஸ் போடும் அளவிற்கு நான் பெரிய ஆளாக மாறிவிட்டேன். இவ்வளவு ஏன் என்னுடைய தலைமுடி பற்றி நிறைய மீம்ஸ் வருகிறது. அதற்காகவே நான் இப்போ தலைமுடியை ஒழுங்காக வைத்துக் கொள்கிறேன் என்று கூறியுள்ளார்.

இதையடுத்து, தற்போது மறைந்த புரட்சித்தலைவர் எம்.ஜி.ஆர். உடன், தமிழிசை இருக்கும் சிறு வயது புகைப்படம் ஒன்று சமூக வலைதளங்களில் வைரலாக பரவி வருகிறது. இந்தப் புகைப்படத்தில் தமிழிசையைப் பார்த்து எம்.ஜி.ஆர். சிரிப்பது போன்று இடம் பெற்றுள்ளது. இதில், இருப்பது உண்மையாகவே தமிழிசை தானா என்ற சந்தேகம் எழுந்துள்ளது. இது தொடர்பாக எந்த வித தகவலும் வெளியாகவில்லை என்பது குறிப்பிடத்தக்கது.