தேர்தல் தோல்விக்கு அப்படியென்ன காரணம்; கூடியது தமிழக பாஜக நிர்வாகிகள் கூட்டம்!

நடந்து முடிந்த 17வது மக்களவைக்கான தேர்தலில், தமிழகத்தில் அதிமுக உடன் கூட்டணி வைத்த பாஜக படு தோல்வியை சந்தித்தது. போட்டியிட்ட 5 தொகுதிகளில் ஒன்றில் கூட வெற்றி பெற முடியவில்லை.

ஆனால் தேசிய அளவில் பாஜக தலைமையிலான கூட்டணி பிரம்மாண்ட வெற்றி பெற்றியை பதிவு செய்து, மீண்டும் ஆட்சியை பிடித்துள்ளது. இந்நிலையில் மக்களவை தேர்தல் தோல்வி, வரும் உள்ளாட்சி தேர்தலில் கட்சியின் நிலைப்பாடு உள்ளிட்டவை குறித்து ஆலோசனை நடத்த தமிழக பாஜகவின் நிர்வாகிகள் கூட்டம் கூடியது.

இதற்கு தேசிய பொதுச் செயலாளர் முரளிதரராவ் தலைமை வகித்தார். மேலும் பாஜகவின் தமிழக துணை பொறுப்பாளர் சிடி ரவி, மாநிலத் தலைவர் தமிழிசை சவுந்திரராஜன், முன்னாள் அமைச்சர் பொன்.ராதாகிருஷ்ணன், தேசிய செயலாளர் ஹெச்.ராஜா, மூத்த தலைவர்கள் வானதி ஸ்ரீனிவாசன், ஜி.எஸ்.நரேந்திரன், கேசவ வினாயகம் உள்ளிட்டோர் கலந்து கொண்டனர்.

இந்த கூட்டம் இன்று காலை 10.30 மணிக்கு தொடங்கி, பிற்பகல் 1.30க்கு நிறைவு பெற்றது. இதில், மோடிக்கு எதிரான அலை தமிழகத்தில் இருந்தது. அதனை திமுக - காங்கிரஸ் கூட்டணி சாதகமாக பயன்படுத்திக் கொண்டு வெற்றி பெற்றதாக கூறியுள்ளனர்.

இந்த தேர்தலில் பாஜகவினர் 1.50 லட்சம் முதல் 3 லட்சம் வாக்குகள் வரையிலான வித்தியாசத்தில் தோல்வியுற்றது குறிப்பிடத்தக்கது.