ஜூன் 11, 12ல் டான்செட் நுழைவுத் தேர்வு

அண்ணா பல்கலைக் கழகத்திற்கு உட்பட்ட கல்லூரிகளில், முதுநிலை படிப்புகளில் சேர்வதற்கான டான்செட் நுழைவுத்தேர்வு ஜூன் 11, 12 ஆகிய தேதிகளில் நடத்தப்படும் என, அறிவிக்கப்பட்டுள்ளது.

அண்ணா பல்கலைக் கழகத்தின் கீழ் செயல்படும் 550 என்ஜினீயரிங் கல்லூரிகளில், எம்.இ., - எம்.டெக்., - எம்.பி.ஏ., - எம்.சி.ஏ., போன்ற முதுநிலை படிப்புகளுக்கு டான்செட் நுழைவுத் தேர்வு நடத்தி மாணவர்கள் சேர்க்கப்படுகின்றனர்.

இதன்படி, வரும் கல்வி ஆண்டில், எம்.பி.ஏ., - எம்.சி.ஏ., படிப்புகளுக்கு, ஜூன், 11ம் தேதியும், முதுநிலை படிப்பில் சேர, ஜூன், 12ம் தேதியும், டான்செட் நுழைவுத் தேர்வு நடத்தப்படுகிறது. இந்த தேர்வு எழுத விரும்புவோர், மே 5 முதல் மே 17 வரை ஆன்லைனில் விண்ணப்பிக்கலாம்.

அண்ணா பல்கலைக்கழகத்தின் அதிகாரப்பூர்வ இணையதளம் மூலமாக விண்ணப்பங்களை பூர்த்தி செய்து அனுப்ப வேண்டும். பொதுப்பிரிவு மாணவர்களுக்கு ரூ.500; தலித், அருந்ததியர் மற்றும் பழங்குடியின மாணவர்களுக்கு ரூ.250 விண்ணப்ப கட்டணமாக நிர்ணயிக்கப்பட்டுள்ளது.