பாஜக மீதான குற்றச்சாட்டு அடிப்படை ஆதாரமற்றது: தமிழிசை

சென்னை: டிடிவி தினகரன் கைதில் பாஜக மீது குற்றம் சுமத்துவது அடிப்படை ஆதாரமற்றது என தமிழக பாஜக தலைவர் தமிழிசை தெரிவித்துள்ளார்.

இரட்டை இலை சின்னதை பெற லஞ்சம் வழங்கியதாக கூறப்பட்ட புகாரில், டிடிவி தினகரனுக்கு டெல்லி போலீசார் சம்மன் அளித்திருந்தனர். சம்மனின் அடிப்படையில் டெல்லி போலீசார் முன்பு தினகரன் ஆஜரானார். தொடர்ந்து, கடந்த நான்கு நாட்களாக அவரிடம் டெல்லி போலீசார் விசாரணை மேற்கொண்டு வந்த நிலையில், டிடிவி தினகரன் தற்போது கைது செய்யப்பட்டுள்ளார்.

தினகரன் கைது குறித்து கருத்து தெரிவித்த, அதிமுக அம்மா அணியை சேர்ந்தவரும், தினகரனின் ஆதரவாளருமான நாஞ்சில் சம்பத், டிடிவி தினகரன் கைது செய்யப்பட்டதில் பாஜக-வின் அரசியல் சதி உள்ளது என பகிரங்கமாக குற்றம் சாட்டினார்.

இந்நிலையில், டிடிவி தினகரன் கைதில் பாஜக மீது குற்றம் சுமத்துவது அடிப்படை ஆதாரமற்றது என தமிழக பாஜக தலைவர் தமிழிசை தெரிவித்துள்ளார். மேலும், ஆதாரம் இருப்பதால் தான் தினகரன் கைது செய்யப்பட்டுள்ளார். சட்டம் தன் கடமையை செய்தே தீரும் எனவும் தமிழிசை தெரிவித்துள்ளார்.

அவர்கள் மீது குற்றங்களை வைத்துக் கொண்டு எப்படி பாஜகவை குறை கூற முடியும் என கேள்வி எழுப்பியுள்ள தமிழிசை, தமிழகத்துக்கு தினகரன் அவமானத்தை ஏற்படுத்தி தந்துள்ளார் எனவும் குற்றம் சாட்டியுள்ளார்.

முன்னதாக, அதிமுக தலைமைக்கு எதிராக போர்க்கொடி தூக்கியுள்ள பன்னீர்செல்வத்தின் பின்னணியில் பாஜக உள்ளது. தமிழகத்தில் ஆளுங்கட்சிக்குள் நிலவும் பிரச்னைக்கு பாஜக தான் காரணம். கொல்லைப்புறம் வழியாக நுழைந்து, தமிழக்கத்தில் காலூன்ற பாஜக முயற்சி செய்கிறது என பல்வேறு விமர்சனங்கள் முன் வைக்கப்பட்டு வந்தன என்பது குறிப்பிடத்தக்கது.
The charge on the BJP is baseless: Tamilisai