சைக்கிள் ஓட்டும் ஸ்டாலின்... இதுக்கு பின்னாடி இவ்வளவு இருக்கா?

திமுக தலைவர் மு.க.ஸ்டாலின் சைக்கிள் ஓட்டும் வீடியோ காட்சி ஒன்று சமூக வலைதளங்களில் வேகமாக வைரலாகி வருகிறது. இந்நிலையில், இந்த வீடியோவின் பின்புலம் குறித்து ஏராளமான கருத்துகளும் கேள்விகளும் எழுந்துள்ளன.

திமுக முன்னாள் தலைவர் கருணாநிதியின் இறப்புக்குப் பிறகு திமுக தலைவராக ஸ்டாலின் பொறுப்பேற்றுக்கொண்ட போது ஸ்டாலினுக்கு வயது 65. அப்போது ஸ்டாலினைக் குறித்து எழுந்த முதல் விமர்சனமே, இத்தனை வயதுக்குப் பிறகு தலைவராக பொறுப்பேற்றுள்ளாரே என்பதுதான்.

அதன்பிறகு தேர்தல் வெற்றிக்கு உதவியாக பிரபல தேர்தல் உத்தியாளரான பிரசாந்த் கிஷோரை நியமித்தது திமுக. அதன் விளைவாக திமுகவின் உள்கட்டமைப்புக்குள்ளும், புற விழாக்களின்போது ஸ்டாலின் நடந்து கொள்ளும் விதத்திலும் ஏராளமான மாற்றங்கள் செய்யப்பட்டன.

குறிப்பாக, பொதுவெளியில் பேசுவதால் ஏற்படும் உளறல்கள் ஸ்டாலினின் நன்மதிப்பைக் கெடுப்பனவாக இருந்தன. அதனைத் தவிர்க்கும் விதமாக, பொதுவெளிகளில் நேரடியாக இனி பேசக்கூடாது. பெரும்பாலும் வீடியோ வழியாகவே ஸ்டாலின் பேசுவார் என்று மாற்றப்பட்டது. அதன்படி நடந்து கொண்டிருக்கையில், கொரோனாவும் வந்துவிட இன்னும் கூடுதல் பலமானது ஸ்டாலினுக்கு.



அந்த வகையில் “வயது முதிர்வு” என்னும் மற்றுமொரு விமர்சனத்தைத் தவிர்க்க தற்போது இந்த சைக்கிள் ஓட்டும் வீடியோ வெளியாகியுள்ளது என்று சமூக வலைதளங்களில் பேசத்தொடங்கியுள்ளனர்.

மூளை இல்லாதவர்கள்: பிரசாந்த் கிஷோருடன் கைகோர்த்த திமுகவை விமர்சித்த எடப்பாடி

தனக்கு இன்னும் வயதாகிவிடவில்லை என்பதையும், தான் நல்ல ஆரோக்கியத்துடனேயே இருப்பதையும் மக்களுக்கு உணர்த்த வேண்டிய அவசியம் ஸ்டாலினுக்கு உள்ளதாகவே பார்க்கப்படுகிறது. அந்த வகையில், இந்த சைக்கிள் ஓட்டும் வீடியோவும் பிரசாந்த் கிஷோரின் திட்டங்களில் ஒன்றாக இருக்கலாம் என்ற கருத்துகள் சமூக வலைதளங்களில் பரவி வருகின்றன.