கொரோனா: தனியார் மையங்களில் இலவச பரிசோதனை சாத்தியமா? - திருமாவளவன் கேள்வி

கொரோனா பரிசோதனையை இலவசமாக மேற்கொள்ள சொன்னால், தனியார் மையங்கள் அதனை மறுக்க வாய்ப்புள்ளது என்று விடுதலை சிறுத்தைக் கட்சித் தலைவர் தொல்.திருமாவளவன் தெரிவித்துள்ளார்.

இதுதொடர்பாக அவர் மேலும் தெரிவித்துள்ளதாவது:
கொரோனா தொற்று இருக்கிறதா என்பதை அறியும் பரிசோதனையை தனியார் பரிசோதனை மையங்களும் இலவசமாகச் செய்ய வேண்டும் என்று உச்ச நீதிமன்றம் இடைக்கால உத்தரவு ஒன்றைப் பிறப்பித்துள்ளது. இதை விடுதலைச் சிறுத்தைகள் கட்சியின் சார்பில் வரவேற்கிறோம்.

பரிசோதனை மட்டுமின்றி, தனியார் மருத்துவமனைகளில் இதற்கு சிகிச்சையும் இலவசமாக வழங்கப்பட வேண்டும். அதற்கு மத்திய அரசு உரிய நடவடிக்கைகளை எடுக்க வேண்டும் என்று வலியுறுத்துகிறோம்.

தொகுதி மேம்பாட்டு நிதி ரத்து: திருமாவளவன் எதிர்ப்பு!

கொரோனா தொற்று இருக்கிறதா என்பதை அறியும் பரிசோதனையைத் தனியார் பரிசோதனை மையங்களும் மேற்கொள்ளலாம்; அதற்கு ரூபாய் 4,500 வரை கட்டணம் வசூலிக்கலாம் என்று மத்திய அரசு ஏற்கெனவே ஆணையிட்டிருந்தது.

ஆனால், பல்வேறு தனியார் சோதனை மையங்களில் 11 ஆயிரம் ரூபாய் வரை இதற்கு வசூல் செய்யப்பட்டு வந்ததாக செய்திகள் வெளியாகின. இதனை எதிர்த்து தாக்கல் செய்யப்பட்ட பொதுநல வழக்கை விசாரித்த உச்ச நீதிமன்றம், தனியார் மருத்துவமனைகளின் சோதனை மையங்கள் இலவசமாக இந்த சோதனையை மேற்கொள்ள வேண்டும் என உத்தரவிட்டுள்ளது.

அதிமுகவை ‘பிரேக் அப்’ பண்ண சொன்ன திருமாவளவன்

எனினும், இலவசமாக பரிசோதனை செய்யச் சொன்னால், தனியார் மையங்கள் அதனை மறுப்பதற்கு வாய்ப்புள்ளது. எனவே, ஒவ்வொரு சோதனைக்கும் குறைந்தபட்ச கட்டணம் ஒன்றை அந்த மையங்களுக்கு வழங்க அரசு முன்வர வேண்டும் என்று மத்திய, மாநில அரசுகளைக் கேட்டுக்கொள்கிறோம்.

அதுமட்டுமின்றி, கொரோனா பாதித்த நோயாளிகளுக்கு தனியார் மருத்துவமனைகள் கட்டணம் வசூலிக்காமல் மருத்துவம் செய்யும் வகையில், சிகிச்சைக்கான தொகையை மத்திய, மாநில அரசுகள் அந்தந்த மருத்துவமனைகளுக்கு அளிக்க வேண்டுமெனவும் விடுதலைச் சிறுத்தைகள் கட்சியின் சார்பில் கேட்டுக்கொள்கிறோம் என்று திருமாவளவன் கோரியுள்ளார்.