“திமுக எம்எல்ஏக்கள் பலர் பாஜகவில் இணைய தயார்” வி. பி துரைசாமி!

திமுக நிர்வாகிகள் தொடங்கி, தொண்டர்கள் பலரும் அதிருப்தியில் உள்ளதாகவும் அவர்களில் பலர் பாஜகவில் இணைய ஆர்வம் காட்டி வருவதாகவும் தமிழ்நாடு பாஜக துணை தலைவர் வி. பி துரைசாமி கூறியுள்ளார்.

வி. பி. துரைசாமிக்கு எம்பி பதவி வழங்கப்படவில்லை என திமுகவிலிருந்து விலகி, பாஜகவில் இணைந்தார். பாஜகவில் இணைந்ததையடுத்து வி. பி. துரைசாமிக்கு மாநில துணை தலைவர் பதவி வழங்கப்பட்டது.

துரைசாமியை தொடர்ந்து, திமுகவின் நடவடிக்கை குறித்து வெளிப்படையாக அதிருப்தி வெளிப்படுத்திய சென்னை ஆயிரம் விளக்கு சட்டசபை உறுப்பினர் கு. கா செல்வம், பாஜகவில் இணைந்தார். இந்த சம்பவம் தமிழ்நாடு அரசியலில் பெரும் பரபரப்பை ஏற்படுத்தியுள்ளது.

இந்த சூடு அடங்குவதற்கு முன்பாக, திமுகவை சேர்ந்த பலர் பாஜகவில் இணைவார்கள், அதற்கு திமுகவில் பல நிர்வாகிகள் தயாராக உள்ளார்கள் என துரைசாமி கூறியுள்ளார். தனியார் செய்தி சேணல் ஒன்றுக்கு பேட்டியளித்த துரைசாமி கூறியதாவது:
திமுகவில் உள்ள 60 மாவட்டங்களிலும் கட்சிக்கு எதிராக அதிருப்தி கிளம்பியுள்ளது. அப்படி அதிருப்தியில் உள்ள பலர் பாஜகவில் இணைய ஆர்வம் காட்டி வருகின்றனர்.

திமுகவில் இருந்து தைரியம் இருந்தால் நீக்குங்கள்: கு.க.செல்வம் சவால்

அதுமட்டுமின்றி திமுக எம்எல்ஏக்கள் பலரும் பாஜகவில் இணைய உள்ளனர். கந்த சஷ்டி கவசம் குறித்து சர்ச்சை எழுந்தபோது, அதற்கு எதிராக ஸ்டாலின் கருத்து தெரிவிக்கவில்லை என்பதே இந்த அதிருப்தி அலைக்கு முக்கியக் காரணம்.

நாங்கள் இருவரும் பதவியை குறிவைத்து திமுகவிலிருந்து வெளியே வரவில்லை. இந்த விவகாரத்தை, “மாட்டுக்கு புல்லு வைக்கணும், குதிரைக்கு கொல்லு வைக்கணும்” என்பதோடு சுட்டிக்காட்ட விரும்புகிறேன்.
இவ்வாறு அவர் கூறினார்.

இதற்கிடையே இதுகுறித்து கருத்து தெரிவித்துள்ள திமுக பொருளாளர் துரைமுருகன், “கு. கா செல்வம் ஒரு பொருட்டே கிடையாது. எத்தனையோ ஜாம்பவான்களை இழந்தபோதே தளராத கட்சி திமுக” எனக் கூறியுள்ளார்.