இன்று கூடுகிறது தமிழக அமைச்சரவை

சென்னை : தமிழக அமைச்சரவை கூட்டம் தமிழக முதல்வர் எடப்பாடி பழனிசாமி தலைமையில் இன்று மாலை கூடுகிறது.

அதிமுக கட்சியில் பல்வேறு சர்ச்சைகள் நிலவி வரும் நிலையில், கடந்த 22-ம் தேதி அந்த கட்சியின் எட்டு எம்.எல்.ஏக்கள் முதல்வர் எடப்பாடி பழனிச்சாமியை சந்தித்தனர். கட்சியில் நிலவும் அதிருப்தி காரணகாமவே அதிமுக எம்.எல்.ஏக்கள் முதல்வரை சந்தித்ததாக கூறப்பட்டது.


இந்நிலையில் கடந்த 23-ம் தேதி பத்து அதிமுக எம்.எல்.ஏக்கள் முதல்வர் எடப்பாடி பழனிச்சாமியை சந்தித்தனர். இதனால் மீண்டும் அதிமுகவில் அதிருப்தி நிலவுகிறதா? என்ற சந்தேகம் எழுந்தது. இந்த சந்திப்பின் போது முதல்வரை சந்தித்த அதிமுக எம்.எல்.ஏக்கள், விரைவில் எம்.எல்.ஏக்கள் கூட்டத்தை கூட்ட வேண்டும் எனவும் தங்கள் தொகுதிகளுக்கு தேவையான நலத்திட்டங்கள் குறித்தும் கோரிக்கை வைத்ததாக தெரிய வந்தது.

இந்நிலையில் இன்று மாலை 3 மணியளவில் தமிழக அமைச்சரவை கூட்டம் நடைபெற உள்ளதாக அறிவிப்பு வெளியானது. இந்த கூட்டத்தில் அதிமுகவில் நிலவும் பிரச்சனை குறித்து பேசப்படாது எனவும், தமிழக அரசின் செயல்பாடுகள் குறித்தும் புதிய திட்டங்கள் குறித்தும் விவாதிக்கப்படும் எனவும் தெரிவிக்கப்படும்.

குறிப்பாக அடுத்த மாதம் மூன்றாம் வாரம் கூட உள்ள தமிழக சட்டப்பேரவை கூட்டத்தொடரில், பட்ஜெட் மீதான மானியக் கோரிக்கை விவாதத்தில் பதிலளிப்பது குறித்தும், வீட்டு மனைகளுக்கான வழிகாட்டி மதிப்பை 25 சதவீதம் குறைப்பது குறித்தும் இந்த கூட்டத்தில் விவாதிக்கப்படும் எனவும் தமிழக அரசு வட்டாரங்கள் தெரிவித்துள்ளன.மேலும் சட்டசபையில் ஜெயலலிதா படம் திறப்பது, எம்.ஜி.ஆர் நூற்றாண்டு விழா கொண்டாட்டம் போன்றவை பற்றியும் விவாதிக்கப்பட வாய்ப்புள்ளதாக தகவல்கள் வெளியாகியுள்ளது.

சசிகலா சிறையில் அடைக்கப்பட்டதை தொடர்ந்து தமிழக முதல்வராக எடப்பாடி பழனிச்சாமி பதவியேற்று மூன்று மாதங்கள் ஆகின்றன. இந்த காலகட்டத்தில் நான்காவது முறையாக தமிழக அமைச்சரவை கூட்டம் நடைபெற உள்ளது குறிப்பிடத்தக்கது.


tn cabinets meets today