அரசு ஊழியர்கள், ஆசிரியர்களின் விடுப்பு சம்பளம் ரத்து; தமிழக அரசு அதிரடி உத்தரவு

சென்னை: அரசு ஊழியர்கள் மற்றும் ஆசிரியர்களுக்கு ஓராண்டுக்கு ஈட்டிய விடுப்பு ஊதியம் தற்காலிகமாக ரத்து செய்யப்படுவதாக தமிழக அரசு உத்தரவிட்டுள்ளது.

கொரோனா வைரஸின் தாக்கம் நாளுக்கு நாள் இந்தியாவில் அதிகரித்து வருகிறது. இதனை கட்டுப்படுத்த பிறப்பிக்கப்பட்ட ஊரடங்கு உத்தரவை பிரதமர் மோடி வருகிற மே மாதம் 3ஆம் தேதி வரை நீட்டித்துள்ளார். இதன் காரணமாக இந்தியா முழுவதும் அத்தியாவசியப் பணிகளைத் தாண்டி வேறு எந்தவொரு பணியும் நடக்கவில்லை. இதனால் பெரும் பொருளாதார இழப்பு ஏற்பட்டுள்ளது. பெருமளவில் பணத்தேவைகளும் ஏற்பட்டுள்ளது.

அதுதவிர, பல்வேறு விழிப்புணர்வு நடவடிக்கைகளை மேற்கொண்டு வரும் மத்திய, மாநில அரசுகள், பொதுமக்கள் உள்ளிட்ட விருப்பப்படும் யார் வேண்டுமானாலும் கொரோனா சிகிச்சை மற்றும் மருத்துவ கட்டமைப்புக்கான நிதியுதவி வழங்கலாம் என அறிவித்துள்ளது.

கொரோனா ஊரடங்கு... அடங்காத உச்ச நீதிமன்றம்... இவ்வளவு வழக்குகளுக்கு தீர்ப்பா?

இதையடுத்து, தொழிலதிபர்கள், திரைப்பிரபலங்கள், சாமானியர்கள், அரசியல்வாதிகள் என பல்வேறு தரப்பினரும் தங்களால் இயன்ற நிதியுதவிகளை செய்து வருகின்றனர். அதுதவிர, அரசு அலுவலர்கள் தங்களது ஒரு மாத ஊதியம், ஒரு நாள் ஊதியத்தை வழங்கி தங்களது பங்களிப்பை செய்து வருகின்றனர்.

இந்நிலையில், அரசு ஊழியர்கள் மற்றும் ஆசிரியர்கள் ஈட்டிய விடுப்பு ஊதியம் ஓராண்டுக்கு தற்காலிகமாக ரத்து செய்யப்படுவதாக தமிழக அரசு உத்தரவிட்டுள்ளது. இந்த உத்தரவானது அனைத்து அரசு நிறுவனங்கள், உள்ளாட்சி அமைப்புகள், பல்கலைக்கழங்கள், வாரியங்கள், கமிஷன்கள், கூட்டுறவுகளுக்கும் பொருந்தும் என தெரிவிக்கப்பட்டுள்ளது. ஏற்கனவே, அனுப்பப்பட்ட கோரிக்கைகள், நிலுவையில் உள்ள பில்கள் எதுவும் செயல்படுத்தப்பட மாட்டது எனவும் உத்தரவில் தெரிவிக்கப்பட்டுள்ளது.

ஆண்டுதோறும் அரசு ஊழியர்கள் எடுக்காத விடுமுறையை எழுதிக்கொடுத்து அதற்கு ஊதியத்தை பெறுவார்கள். வழக்கமாக, ஆண்டுக்கு 15 நாள், 2 ஆண்டுகளுக்கு 30 நாள் ஈட்டிய விடுப்பு ஊதியம் வழங்கப்படும் என்பது குறிப்பிடத்தக்கது.