தென்னை மரத்திலிருந்து சாக்லேட் , பானம், அல்வா தயாரிக்க தமிழக அரசு ஒப்புதல்

சென்னை : தென்னை மரத்திலிருந்து கிடைக்கும் நீரா பானத்தைப் பயன்படுத்தி நீரா சர்க்கரை, நீரா வெல்லம், நீரா தேன், நீரா லட்டு, நீரா கேக் போன்ற மக்கள் உடல்நலத்துக்கு உகந்த பொருட்களை தயாரிக்க தமிழக அரசு ஒப்புதல் அளித்துள்ளது.

இதுகுறித்து தமிழக அரசு வெளியிட்டுள்ள அறிக்கையில், " தமிழ்நாட்டில் சுமார் 8 கோடி தென்னை மரங்கள் 10.74 இலட்சம் ஏக்கர் பரப்பளவில் சாகுபடி செய்யப்படுகின்றன. அகில இந்திய அளவில் தேங்காய் உற்பத்தியிலும், உற்பத்தித் திறனிலும் தமிழகம்முன்னணி வகிக்கிறது.

தென்னை விவசாயிகளின் நீண்ட நாள் கோரிக்கையான தென்னை மரத்திலிருந்து "நீரா" பானத்தினை இறக்கி, பதப்படுத்தி, விற்பனை செய்ய அனுமதி வழங்குவதற்கானகலந்தாய்வுக்கூட்டம் தலைமைச்செயலகத்தில், தமிழ்நாடு முதலமைச்சர் எடப்பாடி கே. பழனிசாமி தலைமையில் 18.4.2017 அன்று நடைபெற்றது.

"நீரா" என்பது தென்னை மரங்களில் மலராத தென்னம்பாளையிலிருந்து உற்பத்தி செய்யப்படும் ஒரு பானமாகும். நொதிக்காத வகையில் உற்பத்தி செய்யப்படும் இந்த பானம், ஆல்கஹால் இல்லாத,உடல்நலத்துக்கு பெரிதும் உதவக்கூடிய இயற்கையான ஊட்டச்சத்து பானமாகும். "நீரா" பானத்தில்,வைட்டமின் ஏ, பி, சி அனைத்தும் ஒருங்கே கிடைப்பதுடன், உடல் வளர்ச்சிக்கு தேவைப்படும் தாதுஉப்புகளும் நிறைந்து காணப்படுகிறது.

தமிழக அரசின் இத்தகைய நடவடிக்கையினால், தமிழக மக்களுக்கு இயற்கையான ஊட்டச்சத்து மிக்க நீரா பானம் கிடைப்பதோடு, சுமார் 1,50,000 தென்னை விவசாயிகளின் வாழ்வு வளம் பெறும். மேலும், நீரா பானத்தைப் பயன்படுத்தி நீரா சர்க்கரை, நீரா வெல்லம், நீரா தேன், நீரா லட்டு, நீரா கேக் போன்ற மக்கள் உடல்நலத்துக்கு உகந்த பொருட்களை தயாரிக்க இயலும். இப்பொருட்கள் சர்க்கரை நோயாளிகளுக்கு உகந்ததாகும். மேலும், நீரா உற்பத்தியின் மூலம் 2.40 இலட்சம் பணியாளர்களுக்கு வேலை வாய்ப்பு கிடைக்கும் என எதிர்பார்க்கப்படுகிறது." என்று அதில் குறிப்பிடப்பட்டுள்ளது.