உள்ளாட்சி தேர்தல் எப்போது? உயர்நீதிமன்றம் இன்று தீர்ப்பு

உள்ளாட்சி தேர்தல் தொடர்பான வழக்கில் சென்னை உயர்நீதிமன்றம் இன்று முக்கியத் தீர்ப்பு வழங்கும் என்று எதிர்பார்க்கப்படுகிறது.

தமிழகத்தில் உள்ளாட்சி தேர்தல் அறிவிப்பு கடந்த 2016ஆம் ஆண்டு அக்டோபர் மாதம் வெளியானது. இதன் பின் திமுக அமைப்புச் செயலர் ஆர்.எஸ்.பாரதி தொடர்ந்த வழக்கை விசாரித்த சென்னை உயர்நீதிமன்றம் உள்ளாட்சி தேர்தல் அறிவிப்பை ரத்து செய்தது. இந்த உத்தவரவை எதிர்த்து தமிழகத் தேர்தல் ஆணையம் மேல் முறையீடு செய்தது.

இதனிடையே உள்ளாட்சி அமைப்புகளில் தனி அதிகாரிகள் நியமனத்தை எதிர்த்தும், அவர்களது பதவிக்காலத்தை நீட்டிப்பதை எதிர்த்தும் ஒரு தன்னார்வ அமைப்பு மனுத் தாக்கல் செய்தது. உள்ளாட்சி தேர்தலை விரைந்து நடத்த வலியுறுத்தி திமுக சார்பிலும் மற்றொரு மனு தாக்கல் செய்யப்பட்டது.

இந்த மனுக்களை உயர்நீதிமன்ற தலைமை நீதிபதி இந்திரா பானர்ஜி, நீதிபதி எம்.சுந்தர் அடங்கிய அமர்வு விசாரித்தது. இந்த வழக்கில் கடந்த வெள்ளிக்கிழமையே (செப்.,1) தீர்ப்பு வெளியாகும் என்று எதிர்பார்க்கப்பட்டது. ஆனால், தலைமை நீதிபதி வர முடியாமல் போனதால், எதிர்பார்த்தபடி அன்று தீர்ப்பு வெளியாகவில்லை.

இந்நிலையில், இன்று உள்ளாட்சித் தேர்தல் நடத்துவது பற்றிய முக்கியத் தீர்ப்பு வெளியாகும் என்று நம்பப்படுகிறது.