மொபைல்ஃபோன் "இன்கம்மிங் கால் டைமிங்"... டிராய் அதிரடி உத்தரவு

நமது மொபைல்ஃபோனில் இருந்து வேறொரு நபரை மொபைலில் அழைக்கும்போது, அந்த அழைப்பை ஏற்க நிர்ணயிக்கப்பட்டுள்ள கால அளவு "ரிங்கிங் டைம்" எனப்படுகிறது. இந்தியாவில் தொலைத்தொடர்பு சேவைகள் வழங்கும் நிறுவனங்களுக்கு இந்த கால அளவு, 45 வினாடிகளாக நிர்ணயிக்கப்பட்டிருந்தது.

இந்த நிலையில், ஜியோ நிறுவனம் தமது இன்கம்மிங் ரிங்கிங் டயத்தை, திடீரென 20 வினாடிகளாக குறைத்தது.

இதன் மூலம், தங்களது நிறுவனத்தின் தொலைத்தொடர்பு சேவையை பயன்படுத்தி வரும் வாடிக்கையாளர்களுக்கு, வேறு நெட்வொர்க்கில் இருந்து வரும் அழைப்புகள் மிஸ்டுகாலாக மாறும் வாய்ப்பை ஜியோ அதிகரித்துள்ளது.

அரசுக்கு ரூ.4,500 கோடி செலுத்திய ஜியோ, ஏர்டெல், வோடஃபோன்!

இதன் காரணமாக ஜியோ நெட்வொர்க்கிற்கு வரும் இன்கம்மிங் கால்கள், அவுட்கோயிங் கால்களாக மாறும் அளவு 25 சதவீதம் அதிகரித்துள்ளது.

இதன் மூலம் ஒரு அவுட்கோயிங் காலிற்கு 6 பைசா வீதம், பிற தொலைத்தொடர்பு நிறுவனங்களிடம் இருந்து ஜியோ சேவைக் கட்டணம் பெற்று வருகிறது என, ஏர்டெல் நிறுவனம் டிராயிடம் குற்றம்சாட்டியிருந்தது.

இதையடுத்து, அனைத்து தொலைத்தொடர்பு வசதிகளை வழங்கும் நிறுவனங்களின் இன்கம்மிங் கால்களுக்கான "ரிங்கிங் டைம்" கால அளவை 30 வினாடிகளாக நிர்ணயித்து டிராய் இன்று உத்தரவிட்டுள்ளது.

இதேபோன்று, லேண்ட்லைன் வசதிகளுக்கான ரிங்கிங் டைமிங் கால அளவை ஒரு நிமிடமாக நிர்ணயித்தும் டிராய் உத்தரவிட்டுள்ளது.