சசிகலாவை இன்று சந்திக்கிறார் டிடிவி தினகரன்

ஜெயலலிதா மறைவுக்குப் பின் அதிமுக பிளவுப்பட்டதைத் தொடர்ந்து அமமுக என்ற புதிய கட்சியை டிடிவி தினகரன் தொடங்கினார். அவரது ஆதரவாளர்களாக இருந்த 18 எம்.எல்.ஏ.க்கள் சட்டப்பேரவை சபாநாயகரால் தகுதி நீக்கப்பட்டனர்.

அமமுகவில் அமைப்புச் செயலாளராக இருந்த தகுதி நீக்கப்பட்ட முன்னாள் எம்.எம்.ஏ. செந்தில் பாலாஜி அண்மையில் திமுகவில் ஐக்கியமானார். இதனையடுத்து அரவக்குறிச்சியில் செந்தில் பாலாஜியின் ஆதரவாளர்கள் அமமுகவிலிருந்து அதிமுகவுக்கே தாவினர்.

இதனால் அமமுக பலவீனமடைந்து வருகிறது என அரசியல் விமர்சகர்கள் கூறுகின்றனர். இந்நிலையில், அக்கட்சியின் துணைப் பொதுச்செயலாளர் டிடிவி தினகரன் இன்று சிறையில் இருக்கும் வி.கே. சசிகலாவைச் சந்திக்க உள்ளார்.

தினகரனுடன் தங்க தமிழச்செல்வன், மாரியப்பன் கென்னடி, ஏழுமலை மற்றும் கதிராமங்கலம் உள்ளிட்ட 9 தகுதி நீக்கப்பட்ட முன்னாள் எம்.எல்.ஏ.க்களும் பெங்களூரு பரப்பன அக்கிரகார சிறைக்குச் செல்கின்றனர்.

செந்தில் பாலாஜி தினகரனுக்கு டிமிக்கி கொடுத்துவிட்டு திமுகவில் சேர்ந்த பின் முதல் முறையாக தினகரன் சசிகலாவை சந்திக்க உள்ளார். இதற்கு முன் கடந்த மாதம் தன் ஆதரவாளர்களுடன் தினகரன் சசிகலாவை சிறையில் சந்தித்தார்.