டிடிவி தினகரன் பதவி விலக வேண்டும்: அமமுக நிர்வாகிகள் கூட்டத்தில் தீர்மானம்

கோவை: டிடிவி தினகரன் சட்டமன்ற உறுப்பினர் பதவியை ராஜினாமா செய்ய வேண்டும் என அமமுக நிர்வாகிகள் கூட்டத்தில் தீர்மானம் நிரைவேற்றப்பட்டுள்ளது.

முன்னாள் முதல்வர் ஜெயலலிதா மறைவுக்கு பின்னர் அதிமுகவில் ஏற்பட்ட பல்வேறு திருப்பங்களில் சசிகலா மற்றும் டிடிவி தினகரன் ஓரங்கட்டப்பட்டு, ஈபிஎஸ்-ஓபிஎஸ் தலைமையில் அக்கட்ச்சி ஒருங்கிணைந்ததும் ஒன்று. அதன்பின்னர், அம்மா மக்கள் முன்னேற்ற கழகம் என்ற கட்சியை டிடிவி தினகரன் ஆரம்பித்தார். ஆனால், கட்சியின் முக்கிய நபர்களாக வலம் வந்த தங்க தமிழ்செல்வன், செந்தில் பாலாஜி உள்ளிட்ட பலர் டிடிவி கட்சியில் இருந்து வெளியேறி வேறு கட்சியில் இணைந்தனர்.

அந்த வகையில் அதிருப்தி நிர்வாகியாக இருக்கும் அமமுக கர்நாடக மாநில செயலாளர் புகழேந்தி, கடந்த சில மாதங்களுக்கு முன்பு தினகரனை பகிரங்கமாக திட்டுவது போன்ற வீடியோ ஒன்ற சமூக வலைதளங்களில் வெளியானது. இதனை புகழேந்தி ஒப்புக்கொண்ட நிலையில், இதுகுறித்து விசாரித்து நடவடிக்கை எடுக்கப்படும் என டிடிவி தினகரன் தெரிவித்திருந்தார். மேலும் தினகரனின் நடவடிக்கைகள் சமீப காலமாக சசிகலாவிற்கு பிடிக்கவில்லை எனவும், புகழேந்தியை கட்சியை விட்டு வெளியேற்றும் எண்ணம் அவருக்கு இல்லை எனவும் சொல்லப்படுகிறது. இந்த விவகாரங்கள் அனைத்துக்கும் சசிகலா சிறையில் இருந்து வெளியே வந்ததும் தீர்வு எட்டப்படும் என அமமுக வட்டாரங்கள் தெரிவிக்கின்றன.

இந்த நிலையில், அமமுக கர்நாடக மாநில செயலாளர் புகழேந்தி தலைமையில் அம்மா மக்கள் முன்னேற்ற கழக நிர்வாகிகள் ஆலோசனை கூட்டம் கோவையில் நடைபெற்றது. இந்த கூட்டத்தில், தகுதி நீக்க வழக்கை எதிர்கொள்ளாமல் 18 சட்டமன்ற உறுப்பினர்களும் தேர்தலை சந்தித்தது பதவி இழக்க காரணம். அதற்கு காரணமான டிடிவி தினகரன் சட்டமன்ற உறுப்பினர் பதவியை ராஜினாமா செய்ய வேண்டும். வேலூர் நாடாளுமன்ற தேர்தல் மற்றும் தற்போது நடைபெறும் நாங்குநேரி விக்கிரவாண்டி சட்டப்பேரவை தொகுதி இடைத்தேர்தலில் அமமுக போட்டியிடாதது பெரும் பின்னடைவை கொடுத்துள்ளது. உள்ளாட்சித் தேர்தலில் போட்டியிட்டால் அமமுக சகாப்தம் முடிவுக்கு வரும் என டிடிவி தினகரனுக்கு எதிராக பல்வேறு தீர்மானங்கள் நிறைவேற்றப்பட்டுள்ளன.