கனிமொழிக்கு போட்டியாக உதயநிதி ஸ்டாலின்: சொல்கிறார் கடம்பூர் ராஜூ!

அண்மை காலமாகவே திமுகவில் இளைஞர் அணியினருக்கும், உதயநிதிக்கு நெருக்கமானவர்களுக்கும் அதிக முக்கியத்துவம் கொடுக்கப்படுவதாக குற்றம் சாட்டப்படுகிறது. அண்மையில் திமுகவில் இருந்து நீக்கப்பட்ட வி.பி.துரைசாமி, பாஜகவில் தன்னை இணைத்துக் கொண்டார். தற்போது, அக்கட்சியின் துணைத்தலைவராக பொறுப்பு வகித்து வரும் அவர் “உதயநிதி ஸ்டாலினிடம் எம்.பி.பதவிக்காக கெஞ்சினேன். திமுக தலைவர் ஸ்டாலின் அவரை சுற்றியுள்ள சிலரின் பேச்சை கேட்டு செயல்படுகிறார். முக்கிய முடிவுகள் எடுக்கப்பட்ட போது என்னை கலந்தாலோசிக்கவில்லை” என்று குற்றம் சாட்டினார்.

அதேபோல், திமுகவில் இருந்து நீக்கப்பட்ட கு.க.செல்வமும், திமுக மேற்கு மாவட்டச் செயலாளராக உதயநிதி ஸ்டாலினுக்கு நெருக்கமானவராக அறியப்பட்ட சிற்றரசு நியமிக்கப்பட்டதனால் ஏற்பட்ட அதிருப்தியிலேயே கட்சிக்கு எதிரான கருத்துகளை கூறியதாக தெரிகிறது. அரசியல் குறித்து தீவிரமான எந்த கருத்தையும் பேசாத நடிகரும், இயக்குநருமான பார்த்திபன் கூட “உதய சூரியன் உதய் சூரியனாகிறதாம்! சிறுக சிறுக கதிர்கள் பெருக” என்று பகடி செய்திருந்தார்.

இந்த நிலையில், செய்தியாளார்களிடம் பேசிய அதிமுக அமைச்சர் கடம்பூர் ராஜூ, திமுக எம்.பி. கனிமொழிக்கு போட்டியாக உதயநிதி ஸ்டாலின் முன்னிலைப்படுத்தப் படுவதாக விமர்சித்துள்ளார். மு.க.ஸ்டாலின் கனிமொழியை ஏற்றுக்கொள்ளும் மனநிலையில் இல்லை,‌ கனிமொழியும் மு.க.ஸ்டாலினை ஏற்றுக் கொள்ளும் மனநிலையில் இல்லை என்றும் அமைச்சர் தெரிவித்துள்ளார்.

V. P. Duraisamy: கூட்டணி அவ்வளவு தானா? பாஜகவிற்கு செம நோஸ்கட் கொடுத்த அமைச்சர் கடம்பூர் ராஜூ!

மேலும், அதிமுக - பாஜக கூட்டணி தொடர்பாக கருத்து தெரிவித்த கடம்பூர் ராஜூ, தமிழகத்தில் பாஜகவிற்கு எதிர்க்கட்சியாக வர ஆசை வந்திருக்கிறது. இரண்டாவது இடத்துக்கு வருவதற்குதான் திமுக-பாஜக இடையே போட்டி என்று வி.பி.துரைசாமி தெரிவித்திருக்கலாம் என்றார்.