கொறடாவை நீக்க தினகரன் தரப்பு மனு

சென்னை: கொறடா அரியலூர் ராஜேந்திரனை நீக்க வேண்டும் என்று டிடிவி தினகரன் தரப்பில் சபாநாயகர் தனபாலிடம் மனு அளிக்கப்பட்டுள்ளது.

முதல்வர் எடப்பாடி பழனிசாமிக்கு அளித்த ஆதரவை வாபஸ் பெற்றுவிட்டதாக தினகரன் ஆதரவு எம்எல்ஏக்கள் 19 பேர் தமிழக பொறுப்பு ஆளுநர் வித்யாசாகர் ராவிடம் கடிதம் அளித்தனர். தன் ஆலோசனை இல்லாமல் ஆளுநரைச் சந்தித்து கடிதம் அளித்த 19 எம்எல்ஏக்களை தகுதிநீக்கம் செய்ய அதிமுக கொறடா அரியலூர் ராஜேந்திரன் சபாநாயகர் தனபாலுக்கு பரிந்துரைத்தார்.

அவரது பரிந்துரையை ஏற்று தினகரன் ஆதரவு எம்எல்ஏக்கள் 19 பேரும் நேரில் வந்து விளக்கம் கொடுக்க சபாநாயகர் தனபால் நோட்டீஸ் அனுப்பினார்.

இந்நிலையில் கொறடா அரியலூர் ராஜேந்திரனை நீக்கக்கோரி சபாநாயகர் தனபாலிடம், தினகரன் ஆதரவு எம்எல்ஏ வெற்றிவேல் புகார் மனு அளித்துள்ளார். கட்சித் தலைமைக்கு எதிராக செயல்படும் அவரை நீக்க வேண்டும் என மனுவில் அவர் குறிப்பிட்டுள்ளார்.

முன்னதாக, முதல்வர் ஈபிஎஸ் அறிவித்த அதிமுக பொதுக்குழு கூட்டத்திற்கு தடை கோரி வெற்றிவேல் தொடர்ந்த வழக்கை சென்னை உயர்நீதிமன்றம் தள்ளுபடி செய்தது. மேலும், நேரத்தை விணாக்கும் மனுவுக்காக ரூ.1 லட்சம் அபராதமும் விதிக்கப்பட்டது.