யூ-டியூப் சேனல் தொடங்கும் நடிகர் விஜய்!

தமிழகம் முழுவதும் பெரிய அளவில் ரசிகர் பட்டாளம் உள்ள நடிகர் விஜய்யின் அரசியல் வருகை குறித்த பேச்சுகள் அவ்வப்போது அடிபடுவதுண்டு. கடந்த 2009ஆம் ஆண்டே நடிகர் விஜய்யின் ரசிகர் மன்றங்கள் “மக்கள் இயக்கம்” என்ற அரசியல் அமைப்பாக மாற்றப்பட்டது. இதற்கான கொடியும் அறிமுகப்படுத்தப்பட்டு, மக்கள் பிரச்சினைக்கு குரல் கொடுக்க ஆரம்பித்தது. அந்த ஆண்டில் புதுச்சேரியின் அப்போதைய முதல்வர் வைதியலிங்கம் முன்னிலையில் நடைபெற்ற விஜய் மக்கள் இயக்கத்தின் நலட்திட்ட உதவிகள் வழங்கும் விழாவில் பேசிய விஜய், “அரசியலுக்கு கட்டாயம் வருவேன். ஆனால், நிதானமாக வருவேன்” என்று பேசி தனது அரசியல் ஆர்வத்தை வெளிப்படுத்தினார்.

இதற்கு ஏற்ற வகையில் அவரது ரசிகர்கள் பலவிதமான போஸ்டர்களை ஒட்டி விஜய்யின் அரசியல் வருகை குறித்து பரபரப்பை ஏற்படுத்தி வருகின்றனர். இதனிடையே, அகில இந்திய தளபதி விஜய் மக்கள் இயக்கம் என்ற பெயரில் அரசியல் கட்சியாக பதிவு செய்த சம்பவம் பெரும் பேசு பொருளாகியது. விஜய் தரப்பினர் இதற்கு மறுப்பு தெரிவித்து வந்ததற்கிடையே, அகில இந்திய தளபதி விஜய் மக்கள் இயக்கம் என்று விஜய்யின் பெயரில் கட்சி தொடங்கி இருப்பது உண்மைதான். ஆனால் கட்சிக்கும் விஜய்க்கும் சம்பந்தம் இல்லை, விஜய்யின் பெயரில் கட்சியை நான் பதிவு செய்திருக்கிறேன் என்று அவரது தந்தை எஸ்.ஏ.சந்திரசேகர் விளக்கமளித்தார்.

இதனைத்தொடர்ந்து, “எனக்கும், என் தந்தை தொடங்கியுள்ள கட்சிக்கும் நேரடியாகவோ மறைமுகமாகவோ எந்தத் தொடர்பும் இல்லை. எனது பெயரையோ, புகைப்படத்தை பயன்படுத்தினால் சட்டப்படி நடவடிக்கை எடுப்பேன்” என்று விஜய் பகிரங்கமாக தனது தந்தைக்கு எச்சரிக்கை விடுத்தார். மேலும், விஜய் மக்கள் இயக்கத்தில் இருந்து சிலரை நீக்கி நிர்வாக ரீதியாக அதிரடி மாற்றங்களையும் விஜய் மேற்கொண்டார்.

அதிமுக சொன்னது, அமித் ஷா சொன்னாரா? ரஜினியை நம்பும் பாஜக!


இந்த நிலையில், விஜய் மக்கள் இயக்கம் என்ற பெயரில் யூ-டியூபில் சேனல் தொடங்கப்படவுள்ளதாக தெரிவிக்கப்பட்டுள்ளது. விஜய்யின் முடிவுகள் அனைத்தும் இனி அதில்தான் வெளியாகும் என்றும் அறிவிக்கப்பட்டுள்ளது. விஜய் மக்கள் இயக்கம் செய்யும் நற்பணிகளையும் அந்த யூ-டியூப் சேனலில் வெளியிட திட்டமிடப்பட்டுள்ளது. இந்த தகவலை விஜய் மக்கள் இயக்க பொறுப்பாளர் புஸ்ஸி ஆனந்த் அதிகாரப்பூர்வமாக அறிவித்துள்ளார்.