ரஜினியை வம்புக்கிழுத்த விஜயகாந்த் மகன்!

தேமுதிகவின் மாவட்டச் செயலாளர்கள் கூட்டம் ஒரு பக்கம் நடந்துகொண்டிருந்தாலும், விஜயகாந்தின் மகன் விஜய பிரபாகரன் பிறந்த நாள் கொண்டாட்டத்திலும் தேமுதிகவினர் ஈடுபட்டனர்.

பிறந்தநாளை முன்னிட்டு அனைத்து சமய வழிபாட்டுத் தலங்களுக்கும் சென்று பிரார்த்தனை செய்தார் விஜயபிரபாகரன்.

சென்னை பிராட்வேயிலுள்ள மாதா கோயிலில் பிரார்த்தனையில் ஈடுபட்ட விஜய பிரபாகரன், அதன்பின்பு செய்தியாளர்களை சந்தித்தார்.

அப்போது பேசிய அவர், “சட்டமன்ற தேர்தல் கூட்டணி இறுதி செய்யப்படவில்லை. தற்போது அதிமுக கூட்டணியில்தான் அங்கம் வகித்து வருகிறோம். மூன்றாவது அணிக்கு வாய்ப்பிருந்தால் அதற்கும் தயாராக இருக்கிறோம். எங்களுக்கு பயம் கிடையாது” என்று பேசினார்.

ரஜினியோடு ராசியாகிறாரா ஸ்டாலின்?

தேமுதிக தேர்தல் பணிகளில் வேகம் காட்டுவதில்லை என்ற விமர்சனங்கள் எழுந்துள்ள நிலையில் பிரச்சாரத்தில் முன்னணியில் நிற்கும் திமுகவையும் விஜய பிரபாகரன் விமர்சித்தார். “கலைஞர், ஜெயலலிதா இல்லாததால் அனைத்து கட்சிகளுக்கும் இது முதல் தேர்தல் போலதான். தோல்வி பயத்தின் காரணமாக திமுக முன்கூட்டியே சட்டமன்றத் தேர்தல் பிரச்சாரத்தை தொடங்கிவிட்டது. தேர்தலில் போட்டியிடுவதில் எனக்கு பயமில்லை. கட்சித் தலைமை முடிவெடுத்தால் அதற்கும் தயாராகவே இருக்கிறேன். வரமாட்டேன் என்றெல்லாம் சொல்ல மாட்டேன்” என்றார்.

தேர்தலுக்கு தயாராகும் அதிமுக: எடப்பாடியின் ‘நச்’திட்டங்கள்!

ரஜினிகாந்த் குறித்துப் பேசிய அவர், “ரஜினிகாந்த் மீது மிகப்பெரிய மதிப்பு உள்ளது. நேற்று அவரது பிறந்தநாள். அவருக்கு என்னுடைய பிறந்தநாள் வாழ்த்துக்கள். உயிரே போனாலும் தேர்தலை சந்திப்பேன் எனக்கூறிய ரஜினி பிறந்தநாளன்று மக்களை கூட சந்திக்கவில்லை. ஆகவே, அவர் முதலில் கட்சி ஆரம்பிக்கட்டும். அதன்பிறகு நான் என்னுடைய கருத்தைச் சொல்கிறேன்” என்று ரஜினியை விமர்சித்துப் பேசியுள்ளார்.