விநாயகர் சதுர்த்தி விழா: பக்தர்கள் காண சிறப்பு ஏற்பாடு!!

மதுரை மீனாட்சியம்மன் கோயிலில், சுந்தரேஸ்வர், மீனாட்சியம்மனை அடுத்து பக்தர்களின் கவனத்தை ஈர்ப்பவர் அங்குள்ள முக்குறுணி விநாயகரே. எட்டு அடி உயரத்தில் பிரம்மாண்டமாக அமைந்துள்ள விநாயகருக்கு, சதுர்த்தி தினத்தன்று சிறப்பு பூஜையும், ராட்சத அளவிலான கொழுக்கட்டையும் கொண்டு படைப்பதும் வழக்கமாகும்.

விநாயகர் சதுர்த்தியையொட்டி நாளையும், முக்குறுணி விநாயகருக்கு ராட்சத கொழுக்கொட்டை கொண்டு படையல் செய்து வழிபாடும், சிறப்பு பூஜையும் நடத்தப்படும்.

ஆனால், விநாயகர் சதுர்த்தி தினத்தன்று நடைபெறும் சிறப்பு வழிபாட்டில் பல்லாயிரக்கணக்கான பக்தர்கள் பங்கேற்கும் நிலையில், கொரோனா பரவல் தடுப்பு நடவடிக்கையாக இம்முறை பக்தர்களுக்கு அனுமதி அளிக்கப்படாது என்று மதுரை மீனாட்சியம்மன் கோயில் நிர்வாகம் தெரிவித்துள்ளது.

விநாயகர் சதுர்த்திக்கு வீம்பு பிடிப்பவர்கள் டாஸ்மாக் கடைகளை கண்டுக்கொள்ளாதது ஏன்?

அதேசமயம் பக்தர்களின் வசதிக்காக, விநாயகர் சதுர்த்தி விழா நிகழ்வுகளை இணையதளத்தில் ஒளிபரப்ப ஏற்பாடு செய்யப்பட்டுள்ளது. இந்த நிகழ்ச்சியை பக்தர்கள் தங்களது வீட்டில் இருந்தபடி, இந்து சமய அறநிலையத் துறையின் அதிகாரபூர்வ இணையதளமான www.tnhrce.gov.in, கோயிலின் இணையதளமான www.maduraimeenakshi.org ஆகியவற்றில் நாளை (ஆகஸ்ட் 22) நேரடியாக கண்டுகளிக்கலாம் என்று கோயில் நிர்வாகம் கூறியுள்ளது.

முன்னதாக, கடந்த மே மாதம் 4 ஆம் தேதி, சித்தரை திருவிழாவின் முக்கிய நிகழ்வான மீனாட்சி சுந்தரேசுவரர் திருக்கல்யாண நிகழ்ச்சி இணையதளத்தில் நேரடி ஒளிபரப்பு செய்யப்பட்டது குறிப்பிடத்தக்கது.