முன்னாள் முதல்வர் ஜெயலலிதாவின் நெருங்கிய தோழியான சசிகலா சொத்துக் குவிப்பு வழக்கில் பெங்களூரு பரப்பன அக்ரஹாரா சிறையில் தண்டனை அனுபவித்து வருகிறார். அவருக்கு நான்கு ஆண்டு சிறைத்தண்டனை விதிக்கப்பட்டிருந்தது.

பெங்களூரு சிறப்பு நீதிமன்றத்தில் சசிகலா தரப்பு 10 கோடி ரூபாய் அபராதம் செலுத்தியதை தொடர்ந்து ஜனவரி 27ஆம் தேதியன்று அவர் விடுதலையாவார் என எதிர்பார்க்கப்படுகிறது.

இந்நிலையில், முன்கூட்டியே விடுதலையாவதற்காக சசிகலா முயற்சித்து வருவதாக அதிகாரிகள் வட்டாரத்தில் தெரிவித்துள்ளனர். சிறையில் இருந்து முன்கூட்டியே விடுதலையாவதற்காக சசிகலா தரப்பில் மனுத்தாக்கல் செய்யப்பட்டுள்ளதாக தகவல் வெளியாகியுள்ளது.

புரெவி புயல் காரணமாக விடுமுறை, எப்போது தெரியுமா?

அவரது மனுவை சிறைத்துறை அதிகாரிகள் உயரதிகாரிகளுக்கு அனுப்பியுள்ளனர். சசிகலாவை முன்கூட்டியே விடுதலை செய்வது குறித்து அதிகாரிகள்தான் முடிவு செய்ய வேண்டுமென கூறப்படுகிறது.

சிறையில் ஒவ்வொரு மாதமும் நன்னடத்தையுடன் செயல்பட்டால் மூன்று நாட்களுக்கு மன்னிப்பு வழங்கப்படும். சசிகலா சிறையில் 43 மாதங்களை நிறைவு செய்துள்ளார். இதனால் அவரது சிறைத்தண்டனை காலத்தில் 135 நாட்களை குறைக்க முடியும்.

எனவே, இந்த மாதமே சசிகலா விடுதலையாவார் என எதிர்பார்க்கப்படுகிறது. சிறை அதிகாரிகள் வட்டாரத்திலும் சசிகலா இந்த மாதம் வெளியாவார் என வாய்மொழியாக கூறப்பட்டதாக தகவல் வெளியாகியுள்ளது.