நடராஜனின் புதிய உறுப்புகள் நன்றாக செயல்படுகின்றன: மருத்தவர்கள் தகவல்

சொத்துக்குவிப்பு வழக்கில் சிறை சென்ற சசிகலாவின் கணவரும் புதிய பார்வை இதழின் ஆசிரயருமான நடராஜனுக்குப் பொறுத்தப்பட்ட புதிய உறுப்புகள் நன்றாக செயல்படுவதாக மருத்துவர்கள் தெரிவித்துள்ளனர்.

சொத்துக்குவிப்பு வழக்கில் சிறை சென்ற சசிகலாவின் கணவரும் புதிய பார்வை இதழின் ஆசிரயருமான நடராஜன் 74 வயதான நடராஜன் கடந்த 9 மாதங்களாக கல்லீரல் மற்றும் சிறுநீரகத்திற்கு பிரச்னைகளுக்காக சிகிச்சை பெற்று வருகிறார். சென்னையிலுள்ள கிளனேஜல்ஸ் குளோபல் ஹெல்த் சிட்டி மருத்துவமனையில் அவருக்கு கல்லீரல் மற்றும் சிறுநீரக மாற்று அறுவை சிகிச்சை நடைபெற்றது.

இந்நிலையில், அவரது உடல்நிலை குறித்து மருத்துவர்கள் கூறியதாவது:

கல்லீரல் மற்றும் சிறுநீரகம் அறுவை சிகிச்சை முடிந்து இன்றுடன் 19 நாட்கள் நிறைவடைந்த நிலையில் நடராஜனுக்கு பொருத்தப்பட்டுள்ள கல்லீரல் மற்றும் சிறுநீரகம் நல்ல முறையில் இயங்குகிறது. அறுவை சிகிச்சைக்கு பிறகு அவருடைய உடல்நிலையில் நல்ல முன்னேற்றம் ஏற்பட்டுள்ளதால் விரைவாக குணமடைந்து வருகிறார்.

அவருக்கு, ‘டிரக்கியாஸ்டமி’ என்ற செயற்கை சுவாசக்கருவி பொருத்தப்பட்டு அதன் மூலம் சுவாசித்து வருகிறார். இருந்தாலும் அவர் தகவல்களை நல்ல முறையில் பகிர்ந்துகொள்கிறார். தொடர்ந்து அவர் தீவிர கல்லீரல் சிகிச்சை பிரிவில் டாக்டர்களின் தீவிர கண்காணிப்பில் உள்ளார். அவருடைய உடல்நிலை குறித்த மருத்துவ தகவல்கள் அவ்வப்போது அவருடைய குடும்பத்தினருக்கு தெரிவிக்கப்பட்டு வருகிறது.

தற்போதும் தீவிர கல்லீரல் சிகிச்சை பிரிவில் அவர் அனுமதிக்கப்பட்டுள்ளதால், நோய் தொற்று ஏற்பட்டுவிடாமல் தடுப்பதற்காக யாரையும் பார்க்க அனுமதிப்பதில்லை. ஆனால் குடும்பத்தினருக்கு அவ்வப்போது 5 நிமிடம் மட்டும் பார்க்க அனுமதி வழங்கப்படுகிறது.