வருமான வரி ஏய்ப்பு விவகாரம்: விவி மினரல்ஸ் குழும வங்கி லாக்கர்கள் அதிரடி முடக்கம்!

நெல்லை மாவட்டம் திசையன்விளையை தலைமையிடமாகக் கொண்டு விவி மினரல்ஸ் இயங்கி வருகிறது. கடற்கரையோர மண்ணில் இருந்து தாது மணலை பிரித்தெடுத்து வியாபாரம் செய்து வருகின்றனர்.

மேலும் கல்வி நிறுவனங்கள், தொழில் நிறுவனங்கள் உள்ளிட்டவை செயல்பட்டுக் கொண்டிருக்கின்றன. இந்த சூழலில் கடந்த 3 ஆண்டுகளாக வருமான வரி செலுத்தவில்லை என்று வருமான வரித்துறையினருக்கு புகார் வந்தது.

இதையடுத்து கடந்த 25ஆம் தேதி முதல் விவி மினரல்ஸ் நிறுவன உரிமையாளர் வைகுண்டராஜன் வீடு, அலுவலகங்கள், அவரது மகன் வீடு, அலுவலகங்கள் என தமிழ்நாடு முழுவதும் வருமான வரித்துறையினர் சோதனை நடத்தி வருகின்றனர்.

5வது நாளாக இன்று நடைபெற்று வரும் சோதனையில், அந்நிறுவனத்திற்கு சொந்தமான 24 வங்கி லாக்கர்கள், 30 வங்கி கணக்குகள் முடக்கப்பட்டுள்ளன.

இந்நிலையில் விவி மினரல்ஸ் குழுமத்தின் இயக்குநர் வைகுண்டராஜனை சொந்த ஊருக்கு அழைத்துச் சென்று விசாரணை நடத்த வருமான வரித்துறை திட்டமிட்டுள்ளதாக கூறப்படுகிறது.