மளமளவென குறையும் மேட்டூர் அணையின் நீர்மட்டம்:10 நாட்களில் 10 அடி சரிவு!

மேட்டூர் அணையின் நீர்மட்டம் கடந்த 10 நாட்களில் மட்டும் 10 அடி சரிந்துள்ளது விவசாயிகள் மத்தியில் சோகத்தை ஏற்படுத்தியுள்ளது.

கர்நாடக மாநிலத்தில் காவிரியின் நீர்ப்பிடிப்புப் பகுதிகளில் மழை இல்லாத காரணத்தால் கபினி, கிருஷ்ணராஜசாகர் அணைகளிலிருந்து காவிரியில் திறக்கப்படும் உபரிநீரின் அளவு குறைக்கப்பட்டது. இதனால் மேட்டூர் அணைக்கு வரும் நீர்வரத்தும் படிப்படியாகக் குறைந்தது.

நேற்றைய நிலவரப்படி, அணைக்கு வரும் நீர்வரத்து 6 ஆயிரத்து 99 கன அடியாக இருந்த நிலையில், இன்று மேலும் குறைந்து 5 ஆயிரத்து 462 கன அடியாக வந்து கொண்டிருக்கிறது.

இதனிடையே அணையில் இருந்து காவிரி டெல்டா பாசனம் மற்றும் கால்வாய் பாசனத்திற்காக 22ஆயிரத்து 800 கனஅடி தண்ணீர் திறந்து விடப்பட்டுள்ளது. இந்நிலையில், அணைக்கு வரும் நீர்வரத்தை விட, அணையில் இருந்து வெளியெற்றப்படும் நீரின் அளவு அதிகமாக இருப்பதால் மேட்டூர் அணையின் நீர்மட்டம் மளமளவென சரிந்து வருகிறது.

கடந்த 14ஆம் தேதி 115 அடியாக இருந்த அணையின் நீர்மட்டம் படிப்படியாக சரிந்து இன்று 105.62 அடியாக உள்ளது. கடந்த 10 நாட்களில் மட்டும் மேட்டூர் அணை நீர்மட்டம் 10 அடி குறைந்துள்ளது குறிப்பிடத்தக்கது.