வீடியோ ஆதாரம் இருக்கு, விசாரணைக்குத் தயார்: டிடிவி சவால்

குடகு: ஜெயலலிதா மரணம் தொடர்பான குற்றச்சாட்டுகளை பொய் என்று நிரூபிக்க வீடியோ ஆதாரம் இருப்பதாக டிடிவி தினகரன் கூறியுள்ளார்.

கர்நாடக மாநிலம் குடகில் தனது ஆதரவு எம்எல்ஏக்கள் தங்கியுள்ள ரிசார்ட்டில் இன்று செய்தியாளர்களுக்குப் பேட்டி அளித்த டிடிவி தினகரன், ஜெயலலிதா மரணம் தொடர்பான குற்றச்சாட்டுகளை பொய் என்று நிரூபிக்க வீடியோ ஆதாரம் இருப்பதாகவும் சிபிஐ விசாரணை வைத்தால் கூட அதனை எதிர்கொள்ள தயாராக உள்ளதாகவும் கூறியுள்ளார்.

கட்சியைக் காப்பாற்ற வேண்டும் என்பதற்காகத்தான் 18 எம்எல்ஏக்களும் முதல்வருக்கு அளித்த ஆதரவை வாபஸ் பெறுவதாக அறிவித்து ரிசார்ட்டில் வந்து தங்கியுள்ளனர்.

அணிகள் இணைப்பு என்ற பெயரில் அதிமுக அம்மா அணி- அதிமுக புரட்சித்தலைவி அம்மா அணிகள் இணையவில்லை. எடப்பாடி பழனிச்சாமிதான் ஓபிஎஸ் உடன் அதிமுக புரட்சித்தலைவி அம்மாயில் இணைந்துள்ளார். அவர்கள் கூட்டியது அதிமுக புரட்சித்தலைவி அம்மா அணியின் பொதுக்கூட்டம்தான். சசிகலாதான் அதிமுக பொதுச்செயலாளர். அதிமுக அம்மா அணியின் பொதுக்குழு விரைவில் கூட்டப்படும்.

பதவி முக்கியம் என நினைக்காமல் கட்சியை காப்பாற்றவே எங்கள் ஆதரவாளர்கள் உள்ளனர்.அந்த ஒரே நோக்கத்திற்காகவே 18 பேரும் குடகில் தங்கியுள்ளனர். சசிகலா முதல்வராக வேண்டும் என்று கண்ணீர்விட்டு கேட்ட திண்டுக்கல் சீனிவாசன் இப்போது, பதவியை காப்பாற்றிக்கொள்ள வேண்டும் என்ற நோக்கத்தில் வாய்க்கு வந்ததைப் பேசுகிறார். அக்டோபர் 1ஆம் தேதிக்குப் பிறகு சசிகலாகூட ஜெயலலிதாவைப் பார்க்கவில்லை.

ஆட்சி கவிழ்ந்தபின் மீண்டும் தேர்தலில் மாபெரும் வெற்றிபெறுவோம். ஆட்சி போனால் இவர்கள் இருக்கும் இடமே தெரியாது. கட்சித் தொண்டர்களுக்கும், மக்களுக்கும் உண்மை தெரியும். இனி மவுனம்தான் என் பதில். இவர்கள் அளவுக்கு தரம்தாழ்ந்து பேசவேண்டுமா என்று நினைக்கிறேன்.

போயஸ் கார்டனில் தங்கி ஆட்சி, கட்சி ஒருவரிடம் இருக்கவேண்டும் என கூறியவர் தம்பிதுரை. நவம்பர் 8ஆம் தேதி பணமதிப்பு நீக்க உத்தரவிற்குப் பிறகு, வருமானவரி சோதனைக்குப் நடத்த பின், அந்த பட்டியலில் தங்கள் பெயரும் இருப்பதாக அஞ்சுகிறார்கள்.

எம்எல்ஏக்கள் தகுதிநீக்க வழக்கில் எங்களுக்கு சாதகமாகவே தீர்ப்பு வரும்.