உங்க பாராட்டு ஒண்ணும் எங்களுக்கு தேவையில்ல : ஸ்டாலினுக்கு முதல்வர் நோஸ்கட்

மறைந்த முன்னாள் தமிழக முதல்வர் அண்ணாதுரையின் 111 -ஆவது பிறந்த நாள் விழா தமிழகம் முழுவதும் இன்று கொண்டாடப்படுகிறது.

சென்னை சாலிகிராமத்தில் அதிமுக சார்பில் அண்ணா பிறந்தநாள் விழாவுக்கு ஏற்பாடு செய்யப்பட்டிருந்தது. இவ்விழாவில் முதல்வர் எடப்பாடி பழனிசாமி பேசியது:

மாநில முதல்வர் என்ற முறையில் அண்மையில் நான் வெளிநாடுகளுக்கு பயணம் மேற்கொண்டேன். இப்பயணம் எனது தனிப்பட்ட பயணம் அல்ல. 35,000 புதிய வேலைவாய்ப்புகள் என்ற இலக்குடன் பயணம் மேற்கொண்டேன்.

படித்த இளைஞர்கள் பல்லாயிரக்கணக்கில் பெருகி வரும் நிலையில், அவர்களின் வேலைவாய்ப்பை கருத்தில் கொண்டு நான் வெளிநாடுகளுக்கு பயணம் மேற்கொள்ளக் கூடாதா? அதிமுக அமைச்சர்கள் தான் அயல்நாடுகளுக்கு போகக்கூடாதா?

அதிமுக ஆட்சியில் பல நலத் திட்டங்கள் செயல்படுத்தப்பட்டு வருகின்றன. ஆனால், திமுக தலைவர் ஸ்டாலின் மட்டும் திட்டமிட்டு குறைகூறும் நோக்கத்திலேயே அறிக்கைகளை வெளியிட்டு வருகிறார்.

இந்த ஆட்சி ஸ்டானுக்காக அல்ல. தமிழக மக்களுக்கானது. எனவே, அதிமுக ஆட்சியை பொதுமக்கள் பாராட்டினால் போதும். ஸ்டாலினின் பாராட்டு எங்களுக்கு தேவையில்லை.

சென்னை மாநகரில் நிலவும் குடிநீர் பிரச்சனைக்கு விரைவில் நிரந்தர தீர்வு காணப்படும். மெட்ரோ ரயில் திட்டத்தின் இரண்டாம் கட்ட பணிகள் விரைவில் தொடங்கப்படும். ஏழை, எளிய தொழிலாளர் குறித்து கணக்கெடுக்கப்பட்டு, அவர்களுக்கு 2000 ரூபாய் விரைவில் வழங்கப்படும் என்று முதல்வர் உறுதியளித்தார்.