"தினகரனை மீண்டும் கட்சியில் சேர்க்க மாட்டோம்": அதிமுக அமைச்சர்கள் அறிவிப்பு..!

'ஏற்கனவே எடுத்த முடிவின்படி, டிடிவி தினகரன் மற்றும் அவரது குடும்பத்தினரை அதிமுகவில் சேர்க்க வாய்ப்பில்லை' என தமிழக அமைச்சர்கள் உறுதிபட தெரிவித்துள்ளனர்.

அதிமுகவின் இரு அணிகள் இணைய வேண்டுமானாலும், டிடிவி தினகரன் மற்றும் அவரது குடும்பத்தினருக்கு கட்சியில் எந்தவித தொடர்பும் இருக்கக் கூடாது என ஓ.பி.எஸ் தரப்பில் நிபந்தனை விதிக்கப்பட்டது. இந்த நிபந்தனை குறித்து கடந்த ஏப்ரல் 17-ஆம் தேதி மின் துறை அமைச்சர் வேலுமணி வீட்டில் ஆலோசனை நடத்திய தமிழக அமைச்சர்கள், ஓ.பி.எஸ் அணியினரின் நிபந்தனையை ஏற்றுக் கொள்வதாக அறிவித்தனர். இதனைத் தொடர்ந்து அதிமுக மீண்டும் இணையும் என்றால் கட்சியிலிருந்து விலகிக் கொள்ள தயார் என டிடிவி தினகரனும் தெரிவித்தார்.

இதனிடையே இரட்டை இலையை திரும்பப் பெற லஞ்சம் கொடுத்த வழக்கில் கைது செய்யப்பட்ட தினகரன்,நேற்று முன் தினம் ஜாமினில் விடுதலையானார். மீண்டும் கட்சிப்பணியில் தொடருவேன் எனவும் தெரிவித்தார். இதனால் அதிமுகவில் பெரும் குழப்பம் நிலவியது.

இந்நிலையில் இன்று மதியம் 1.30 மணியளவில் தலைமை செயலகத்தில் உள்ள நிதி அமைச்சர் ஜெயக்குமார் அறையில் 20 அதிமுக அமைச்சர்கள் கூடி ரகசிய ஆலோசனை நடத்தினர். சுமார் இரண்டு மணி நேர நடைபெற்ற இந்த ஆலோசனைக்கு பிற்கு, தமிழக முதல்வரை அமைச்சர்கள் சந்தித்து பேசினார். பின்னர் செய்தியாளர்களை சந்தித்த அமைச்சர் ஜெயக்குமார், அமைச்சர்களின் ஆலோசனை கூட்டத்தில் எடுக்கப்பட்ட முடிவுகள் குறித்து தெரிவித்தார்.

“ ஏப்ரல் 17-ஆம் தேதி மின் துறை அமைச்சர் வேலுமணி வீட்டில் தமிழக அமைச்சர்கள் கூடி, கட்சியிலும், ஆட்சியிலும் டிடிவி தினகரன் மற்றும் அவரது குடும்பத்தினரை முழுமையாக விலக்கி வைப்பதாக முடிவெடுக்கப்பட்டது. இதே முடிவில் தற்போதும் உறுதியாக உள்ளோம்.

கட்சியில் இருந்து டிடிவி தினகரன் ஒதுங்கி இருக்க வேண்டும். டிடிவி தினகரன் மற்றும் அவரது குடும்பத்தினரின் தலையீடு இல்லாமல், தமிழகத்தில் நல்லாட்சி நடைபெற்று வருகிறது.தினகரனை சேர்ந்த யாரையும் கட்சியினர் சந்திக்கக் கூடாது.” என தெரிவித்தார்.

மேலும் டிடிவி தினகரனுக்கு ஆதரவளித்து வரும் 10 அதிமுக எம்.எல்.ஏக்கள் மீது நடவடிக்கை எடுக்கப்படுமா? என்ற கேள்விக்கு அவர் பதிலளிக்க மறுத்துவிட்டார்.

we don't want TTV Dinakaran, Says Minister Jayakumar