சென்னையில் 2 நாட்களுக்கு மழை தொடரும்: தமிழ்நாடு வெதர்மேன்

தமிழகம் மற்றும் சென்னையில் இன்றும் நாளையும் மழை இருக்கும் என்றும் புதன் கிழமையில் இருந்து மழை இருக்காது என்று தமிழ்நாடு வெதர்மேன் பிரதீப் ஜான் மற்றும் நார்வே வானிலை ஆய்வு மையம் தெரிவித்துள்ளது.

தமிழத்தில் கடந்த சில நாட்களாக தொடர்ந்து வடகிழக்கு பருவ மழை பெய்து வருகிறது. இதுகுறித்து தமிழ்நாடு வெதர்மேன் பிரதீப் ஜான் தனது பதிவில், ''காலையில் கனமழை இருக்கும். பின்னர் சென்னை முழுவதும் புதன் கிழமை வரை அவ்வப்போது மழை இருக்கும். புதன் கிழமைக்கு மேல் மழை இருக்காது.

சென்னை, திருவள்ளூர், காஞ்சிபுரம் ஆகிய மாவட்டங்களில் நேற்று இரவு முதல் நல்ல மழை பெய்தது. இன்று காலையும் நல்ல மழை பெய்தது. திருப்போரூரில் 62 மிமீ, திருவள்ளூரில் உள்ள கடம்பத்தூரில் 56 மிமீ, புழலில் 40 மி.மீ., சோழவரத்தில் 36மி.மீ., ரெட்ஹில்ஸில் 35 மிமீ., அண்ணா நகரில் 30 மி.மீ., கோலப்பாக்கத்தில் 23 மி.மீ., செம்பரம்பாக்கத்தில் 20 மி.மீ., மீனம்பாக்கத்தில் 13மி.மீ., கிண்டி 10 மி.மீ., தரமணி 10 மி.மீ., மழை பெய்துள்ளது
சென்னையில் இன்று அவ்வப்போது மிதமான முதல் கனமழைக்கு வாய்ப்பு உள்ள்ளது. சென்னையில் விட்டு விட்டு மழை இருக்கும். தரைக்கு மேகங்கள் நகரும்போது மழை அதிகளவில் இருக்கும். நாளை காலையும் கனமழை இருக்கும்.

தமிழகத்தின் மற்ற இடங்களைப் பொறுத்த அளவில் மேற்கு மாவட்டத்தில் குன்னூர், கோவை மற்றும் திண்டுக்கல், கன்னியாகுமரி, திருநெல்வேலி, திருப்பூர், ஈரோடு ஆகிய இடங்களில் மழை பெய்யும்.

டெல்டா பகுதியில் உள்ள கொள்ளிடத்தில் இன்று காலை வரை 160 மி.மீ., மழை பெய்துள்ளது. டெல்டா பகுதிகளில் இன்றும், நாளையும் அதிக மழை பெய்யும். புதன் கிழமை முதல் படிப்படியாக குறையத் துவங்கும். வீரியம் குறையும் காற்றழுத்த தாழ்வு நிலை வங்காள விரிகுடா பகுதிக்குள் நகர்ந்து சென்று விடும்'' என்றுதெரிவித்துள்ளார்.

இதையேதான் நார்வே வானிலை ஆய்வு மையமும் தெரிவித்துள்ளது.

We may see more on and off spells here and there in Chennai till Wednesday